Charter Document - 05330079

A touz ces qui verront et orront ces presentes lettres nous Jehans de Chastoillon cheualiers bailliz de dygenois facons sauoir que cum Pierres des Molins procurour de religiouses persones labbei et le couuant de saint Estiene de Dyion en nom de procurour daux et pour aux hanst fait aiorner par deuant nous Demoingot Monin et Marion freres enfanz et hoirs de feu Perron dit Pontraul qui fut de Cutigney Et en labsence daux proposest en jugement par deuant nous encontre aux en demandant que cum la vile et li habitant de Cutigney qui or sunt et qui hont estei cay en arriers ensamble lour mes et lour tenemenz soient et haient estei par tant de temps quil nest memoire dou commancement taillauble et esploitauble es diz religioux et a lour dicte yglise et li diz Porrons Pontraux et sui deuantiers fussent et haussent estei nez de la dicte vile de Cutigney et homme taillauble et esploitauble des diz religioux et de lour dite yglise et haussent estei demoranz et residanz en la dite vile de Cutigney tenanz lour mes et lour tenemenz en la dite vile ou finaige et es appartenances diceli par lespace de soixante anz et plus de la condition que dessus et par telx se tenessent et sur ce li diz Perrons se fust desauoez des diz religioux et fait a desauoer et se fust auoez et fait a auoer pour homme mons le duc en la vile de Dyion et y fust venuz demorer comme hons mons le duc et y haust estei condampnez de larrecin Et apres ce au temps que li diz Perrons Pontraux vint demorer en la dite vile de Dyion comme hons mons le duc et que il se desauoai des diz religioux il fust et haust estei taillaubles et esploitaubles des diz religioux en la forme et en la meniere que dessus est dit et tenest et haust tenu et possidei tant il cum sui deuantier en la dite vile de Cutigney ou finaige et es appartenances par lespace dessus dit les heritaiges et apres nommez et specifiez cest a sauoir le mes et le maisonement ou li diz Perrons demoroit ensamble le champ qui est aioignant au dit mes item dous journaux de terre assis en la fin dou poirier en trois pieces des queles la premiere est delez le chemin par ou lon vai en bois vesange la seconde fait contour de ce champ et des autres la tierce siet delez la terre qui fut Huguenot Menne item dous journaux qui fierent sus la commune empres la terre es bruz au Mairet item en misenelers doues pieces de terre des quex li vne siet delez la terre qui fut a Loume de Chastial et li autre delez la vie dou molin item en ronceni empres la commune vne piece de terre item en parce vers les aloueres vn journal de terre et siet delez la terre es filles Forquant item en prei rondot le quart dune soiture de prei Et cum li dit religioux et lour dite yglise de saint Estiene de Dyion haient tel droit en lour hommes et sus lour hommes de la dite vile de Cutigney et en lour tenemenz mouanz de par aux et hauoient au temps que li diz Perrons sauoai bourgois mons le duc que quant li homme et habitant de la dite vile font autre soignour en desauoant les diz religioux ou sunt condampnei de murtre ou de larrecin tuit lour biens sunt commis et acquis es diz religioux et a lour dite yglise tum par la costume generaul et notoire de Bourgoigne tum par lenqueste et declaration qui en hai estei faite si cum il appert et est plus aploin contenu en vnes lettres sealees dou seal de la chambre de bone memoire Hugues duc de Bourgoigne en la quele declaration est contenu que totes foiz que li habitant de la dite vile de Cutigney se departent de la soignorie des diz religioux et de lour dite yglise senz lour consentement il perdent moubles et heritaiges et sunt acquis es diz religioux et a lour dicte yglise Et cum li diz Perrons Pontraux au temps que il viuoit et li dit Demoingot Monins et Marions sui enfant et sui hoir detenessent et encor detenient les heritaiges dessus nommez ensamble vne piece de terre assise en roseres selonc Jehan Chappey si nous requeroit li diz procurour en nom que dessus que nous declairessens par nostre sentence diffinitiue les heritaiges dessus nommez appartenir et estre commis es diz religioux et a lour dicte yglise et ensinc le requerest li diz procurour es diz enfanz se il fussent present et que les diz heritaiges rendessent et deliuressent es diz religioux ensamble les yssues que il et lour diz peres en hont leuees et recehues ou pehu leuer et reciuoir jusque a lextimation de vint liures de tornois et que nous en ce les condampnessens et condampnez controignessens se il cognoissessent les chouses dessus dites estre voires et se il le meissent en ny li diz procurour loffroit dou prouer ou ce que mestiers li en seroit a fin de sentencier La quele demande ensinc proposee de par le dit procurour en jugement pardeuant nous en labsence de partie et sur ce les diz enfanz estanz contumaux par trois foiz et trois deffauz donez au dit procurour pour la contumace des diz freres et quarte foiz les diz freres aiornez pour descorper les diz deffaux et derichief aux aiornez a oir droit sus les diz deffauz et aux ades estanz contumaux le procurour des diz religioux estanz en jugement pardeuant nous et requeranz que nous li deissens droit sur les diz deffauz a grant jnstance vehue la dicte demande les diz deffaux et tout le demeney vse dou consoil de proudons hommes pronuncons et a droit par notre sentence diffinitiue les diz religioux estre mis en possession des chouses et heritaiges ci dessus nommez et specifiez ensamble les dites vint liures demandees en nom destimation des yssues leuees des diz heritaiges sauue la question de la proprietei En tesmoignaige de la quel chouse nous hauons mis en ces lettres le seal de nostre bailliaige faites et donees a Dyion le mardi apres la quinzaine de Penthecoste secont jour de nostre assize a Dyion Lan de grace mil CCC et dix et sept