Charter Document - 05330069

En non de Notre Soignour amen Lan de lincarnacion dicelui mil trois cenz et seze ou mois de octobre ge Jehans filz Yuer de Boillans lainier de Perrenote femme dicelui Yuer fais sauoir a touz cels qui verront et orront ces presentes lettres que comme Guillemote li Champenoise de Vile soz Geurey suer de ma dite mere soit trespassee sanz hoirs de son propre corps et ge comme li plux pruchains hoirs voussisse venir a lescheoite et a la succession de la dite Guillemote et religiouse persone labbes de liglise de saint Estiene de Dyion my meist troble et empoichemant en disant que la chose li estoit taillauble et que ge ne la pooie ne deuoie tenir se ge ne venoie demorer au leu et deseruir de lui auxi cum facoit la dite Guillemote ma tante A la parfin dou consoil de prodommes acordez est que ge dou congie de lactorite et dou consantemant dou dit Yuer mon pere hay quitte et quittois a touz jors mais au dit abbe et a siglise la dite eschoite et tout le droit et toute laction que ge ne ma dite mere y poons hauoir par le pris de sexante solz de bons petiz tornois les quelx li diz abbes man hay done de grace et les quelx ge hay de lui recehuz en deniers nombrez et man tien par bien paiez Par quoy nos li diz Jehans et Yuer ses peres promettons par nos et par nos hoirs par nos sairemanz donez corporelmant sur sainz euuangiles et soz lobligacion de touz nos biens que nos ne vierrons contre ceste quittance mas la dite eschoite garantirons au dit abbe et a ses successours et a la dite yglise contre tous eschoitours qui riens y voudront demander par raison de pruchainete ou de succession et renuncons en cest fait par tant comme hun chascun de nos toiche a toutes excepcions de droit et de fait qui nos porroient aidier a venir contre la tenour de ces lettres et volons estre controinz a garder les chouses dessus dites comme de chouse adiugie par la cort monsoignour le duc de Borgoigne a la iurisdiction de la quele nos submettons quant a ce nos nos hoirs et touz nos biens En tesmoingnaige de la quel chouse nous hauons requis le seaul de la dite cort estre mis en ces presentes lettres Cest fait en la presence de Jehan le Ratat notaire de Dyion de Guillemot de Gencigney et de Gautier Fauconot de Dyion clers tesmoinz a ce appelez lan et le mois dessus diz