Charter Document - 05330059

Nous Huedes sires de Grancey cheualiers faisons sauoir a touz que en nostre presence pour ce personelment estaubli Jehamz nostres chambellans de Grancey et Pierres ses freres clers hont cogneu et confessey par deuant nous de lour bone voluntez senz force senz deceuance et senz aucune circonuention que il pour lour et pour lour hoirs hont vendu et en non de pure et leaul vendition baillie quite et deliurey a religious homme et honeste frere Jeham priour de leglise de Saint Germain dou dit Grancey en heritaige perpetuel pour lui et pour ses successours vne piece de pre seant ou finaige de Grancey ou leu con dit la Noe Dame Perrote entre le pre dou dit priour dvne part et la riuiere dautre part et contient autour vne faucie Et hont faite la dite vendition pour le pris et la somme de huyt liures et dix solz de bons tornois petiz Des quels il hont cogneu lour hauoir heu et receu lour paiement auterm en bone monoie nombree et sen sont tenu pour bien paie par deuant nous Pour quoi icil Jehamz et Pierres de la dite piece de pre vendue se sont deuestu pour lour et pour lour hoirs et le dit priour pour lui et pour ses successours en hont reuestu et mis en corporel et perpetuel possession par la tradition de ces lettres Et hont promis par lour sairemenz donez corporelment sus sainz euuangiles en nostre main pour lour et pour lour hoirs et souz lobligation expresse de touz lour biens moubles et heritaiges presenz et auenir ceste dite vendition hauoir ferme et estauble a touz iourz et non faire contre en aucun temps par aucune maniere et icele garentir au dit priour et a ses successours en touz leus et contre touz a lour propres couz et despans Et hont volu et vuelent estre contreint a tenir et garder les chouses dessus dites auxi comme de chouse cogneuhe et adjugie par nostre court a la jurisdiction de la quel court il hont souzmis quant a ce lour et lour hoirs et touz lour biens moubles et heritaiges presenz et auenir Et nous Huedes dessus nommez la dite vendicion volons loons et outroions et lamortissons en tant comme il nous apartient Retenanz a nous et a noz hoirs sus la dite piece de pre justice et seignorie grant et petite et toutes manieres de cas de justice et la garde En tesmoingnaige des quels chouses nous a la priere et a la requeste des diz vendeours hauons mis nostre grant seaul en ces presentes lettres faites et donees le lundi apres la feste saint Nicolas dyuer lan de grace mil trois cenz et quinze