Charter Document - 05330054

En non de Nostre Seignour amen Lan de lincarnation dicelui mil trois cenz et quatorze ou mois de januier je Vienoz diz Maignoz fiz et en arriers Perrenot le Cuerant de Cutigne et de Ysebeaul sa femme fais sauoir a touz cels qui verront et orront ces presentes lettres que mes peres et ma mere dessus dit estoient au tamps que il viuoient et furent tout lour tamps homme taillauble et esploitauble haut et bas de religiouses persones labbey et le couant de saint Estienne de Dyion en la ville de Cutigney et je apres tout mon tamps hay ades estey et suis ancores hons des diz religioux de la condicion de mon pere et de ma mere dessus dit et hay demorez et ancor demore par lespace de quinze anz et de plus dessouz aux et par aux a Ville souz Geurey en la condicion que dessus et tenu feu et leu je say ce quil maient depourtey de grace especiaul et par lour seruise en quoy jay estey et suis ancores de leuer taille de moy et cognois ancores que comme il maient retenu a lour familier et promis a pourueoir en toutes mes necessitez conuenaublemant selont mon estat et encour par supplier et depourter mes deffauz maient doney lour grange lour maison et le mes qui hy appant de Vile souz Geurey et plusours pieces de vignes et de terres et de prez qui sont contenues et designees en lettres saellees de lour seaux que jay sur ce et par ce ancores que de grace especiaul quil mont frainchi de taille a ma vie tant cum je seray obeissanz a aux sanz reclain dautre seignour si cum il est contenu es dites lettres Je en recunpensation de toutes ces choses et par les biens et les cortoisies que jay recehues daux et autan ancor a receuoir je lour doins quictois et deliurois toutes les vignes les terres et les prez que jay acquis perpetuelmant es villes et es finaiges de Geurey et de Ville souz Geurey et man deuiz par maintenant et les diz religioux en reuist et met en corporel possession par la tradition de ces presentes lettres et vuil qui san joient paisiblemant a touz jours mais et lour promet a garantir anuers touz et contre touz a mes propres despens se aucun chalongeour apparoient qui es dites choses les ampoichessient si tost et toutes foiz que je en seray requis daux sus lobligacion de touz mes biens presenz et auenir et lour doins ancor touz mes biens mobles et nonmobles presenz et auenir quelx que il soient et en quelque leu que il puissient estre troue par les causes dessus dites et man deuiz par maintenant et les en reuiz retenu a moy toute voye a ma vie tant solemant luffruit es dites choses dou quel je promot par mon sairement vser atrampeemant et leaulmant et cognois que je les tiens et tanray dor en hauant par aux et en non daux et se il hauenoit que jay ne soit que je mauoasse par autre seignour que par aux je vuil consant et outroy que tantost cum li auoux vanroit a la cognoissance de labbey qui seroit par le tamps ou de ses genz que toutes les graces et les promesses que il mont faites de ma prouision des maisons des vignes des terres et des prez dessus diz fuissient nulles et que toutes ces choses ensamble les choses ou jay retenu luffruit fuissient par maintenant choites en commis a aux en possession et en proprietey et quil les puissient panre de lour auctoritey occupper et approprier a aux sanz contredit de moy ne dautruy qui de moy pehut hauoir cause fuissient en lour justice ou en autruy en quelque leu que elles fuissient en frainchise ou deffors comme les lour propres choses et cognois ancores que cum je haye par lont tamps gouerne par aux lour maison de l'Espay Ville souz Geurey et plusours de lour autres leux et recehu les fruz et les yssues dicels que fait finaul compe bon et leaul sanz force et sanz controinte mas de mon apoinne grey des missions et des receptes dessus dites entre moy et mon seignour labbey je doy de fin de compe es diz religioux trois cenz liures de bons petiz tornois et lour baillois en paye par le payemant de doux cenz liures de la some dessus dite touz les debtes que lon me doit dargent et de blef es doues villes dessus dites a toutes les bestes que jay en commandise et toutes les choses que freres Hugues de Viez Vif celerex de saint Estienne hauoit pris ou saisi sus moy par raison dou dette dessus dit et les autres cent liures je promot randre et paier es diz religioux ou a lour certain commandemant danz doux mois apres lour requeste ou faire lour grey et toutes ces choses dessus dites et vne chascune par soy ansinc comme elles sont dessus dites et deuisees je promot par mon sairemant doney sur sainz euuangiles corporelmant et sus lobligacion de touz mes biens mobles et nonmobles presenz et auenir ou que il soient fermemant tenir garder et acomplir et que je ne varray ne feray venir en contre par moy ne par autre de ci en hauant ne consantiray que autres hi veigne taisiblemant ne en appert Et renuncois en ce fait par mon dit sairemant et sus lobligacion dessus dite a toutes excepcions barres raisons et allegations de droit et de fait que lon porroit dire ne opposer contre la tenour de ces presentes lettres et vuil estre controinz a tenir les choses dessus dites auxi cum de chose adiugie par la court mon seignour le duc de Burgoigne a la juridition de la quel court je submot quant a ce moy et mes hoirs et touz mes biens En tesmoingnaige de la quel chose je requis supplie et obtenu le seaul de la dite court estre mis en ces presentes lettres donees et faites en la presence de Guienot dit Chargeret clerc coadiutour de Jehan François notaire de Dyion de mon seignour Jehan de Crusey prestre demorant a Dyion et de Jehan le Layner de Dyion tesmoinz a ce appelez lan et le mois dessus diz