Charter Document - 05330047

Nous Hugues dux de Borgoigne faceons sauoir a touz que Nous por le remede de nostre ame et des ames de noz ancessours ensieganz les traces de nostre cher seignour et pere cui Deux essoille qui mont ama les religioses et honestes persones labbe et couent de saint Estienne de Diion tant come il vesquist loons de nostre certaine science aggreons ratiffions et confermons en tant come il nous tuiche et puest tuichier es diz religioux perpetuelmant por aux et por lor successours tout ce que il hont acquis en nostre duchie de Borgoigne ou tamps passe jusque au jour de la confection de ces lettres Et yces acquez Nous en tant come il nous tuiche amortissons es diz religioux et à leglise de saint Estiene de Diion lequel amortissemant Nous por nous et por les nostres promettons tenir et garder fermemant et non venir en contre par nous ou par autre taisiblemant ou expressemant sauf et retenu a nous et es nostres es dictes choses et en chascune diceles noz domineures gardes ressorz baronie souerainete et le droit dautrui En tesmoin de ce Nous hauons fait mettre nostre seaul en ces lettres Donees a Talant le lundi apres lascension lan de grace mil trois cenz et quatorze