Charter Document - 05330046

Nous Hugues dux de Burgoigne facons sauoir a touz que nous pour le remide de nostre ame et des ames de nos ancessours ansiganz les traces de nostre chier seignour et pere cui Dex absoille qui mont amay les religiouses et honestes persones labbey et couant de saint Estienne de Dyion tant comme il vesquit loons de nostre certainne science agreons ratiffions et confermons en tant comme il nous tuiche et puet tuichier es diz religioux perpetuelmant por aux et por lour successours tout ce que il hont acquis en nostre duche de Burgoigne ou tamps passey jusques au jour de la confection de ces lettres tant por aux et por lour eglise comme por lour maison Deu de Broichons qui est vnie et conjoincte a lour yglise et de la sale dou dit abbey Et ycels acquez nous en tant comme il nous tuiche amortissons es diz religioux et a liglise de saint Estienne de Dyion et a la dite maison Deu lequel amortissemant nous por nous et por les nostres prometons tenir et garder fermemant et non venir en contre por nous ne por autre taisiblemant ou expressemant sauf et retenu a nous et es nostres es dites choses et en chascune diceles nos domineures gardes ressorz baronies souerainnetez et le droit dautruy En tesmoing de ce nous hauons fait mettre nostre seaul en ces lettres Donees en Talant le lundi apres lascension lan de grace mil CCC et quatorze