Charter Document - 05330045

Vniuersis presentes litteras inspecturis officialis lingonensis salutem in domino Noueritis quod in presencia Johannis Piquardi de Longo Vico clerici tabellionis nostri jurati cui quantum ad ea que sequntur et similia ac maiora commisimus ac etiam tenore presencium committimus vices nostras propter hoc personaliter constitutus dominus Johannes Teste de Dyuione presbiter spontaneus non coactus nec in aliquo circonuentus recognovit et confessus est se vendidisse perpetuo penitus et quittasse religiosis viris abbati et conuentui monasterii sancti Stephani dyvionensis pro se et eorum successoribus duas pecias vinee continentes circa quinque jornalia quarum vna sita est in finagio de Dez en crocillerans juxta vineam Philippi Lanarii et vineam heredum dicti Guerroichon de Talento et alia sita est in finagio de Fontanis in costa juxta vineam religiosorum de Fontenois et vineam heredum Mathei dicti de Puteo de Aqueductu Hanc autem venditionem fecit dictus venditor precio centum triginta librarum turonensium paruorum bonorum et legalium de quibus coram dicto jurato nostro se tenuit plenarie pro pagato penitus et contento De quibus sic venditis dictus venditor se penitus deuestivit et dictos emptores pro se et suis successoribus jnuestiuit corporaliter de eisdem Promittens dictus venditor pro se et eius heredibus jn verbo sacerdotis et sub obligatione omnium bonorum suorum dictas pecias vinee a se superius venditas liberas pro censu et decima prefatis emptoribus et suis successoribus contra omnes perpetuo garantire et in se lictis onus suscipere causamque deffendere propriis suis sumptibus et expensis si qui calumpniatores quod absit apparerent quancito quociens et quacunque parte lictis super hoc fuerit requisitus nec non facere et prestare quicquid in causa euictionis debet fieri et prestari Renunciando in hoc facto exceptionibus venditionis legittime non facte non numerate et non habite pecunie spei future numerationis et habitionis ac omnibus aliis que contra tenorem presencium possent obici seu dici Supponens dictus venditor se et sua quantum ad hec jurisdicioni curie lingonensis ac omnis alterius curie cuiuscunque tam ecclesiastice quam etiam secularis Quibus sic actis coram dicto jurato nostro jdem juratus noster nomine nostro dictum venditorem condempnauit et viua voce monuit ad tenendum et adimplendum premissa sin autem nos ipsum in scriptis excommunicabimus monitione alia non premissa In cuius rei testimonium ad requisitionem dicti venditoris nobis factam per dictum juratum nostrum qui nobis predicta retulit et cui quantum ad hec et maiora fidem plenariam adhibemus sigillum dicte curie lingonensis presentibus litteris duximus apponendum Actum presentibus magistro Haymone de Donna Petra Auberto Dangoste et Johanne Cultelerii testibus ad hoc vocatis die jovis post dominicam qua cantatur cantate anno domini millesimo trecentesimo quartodecimo Johannes Piquardi ita est