Charter Document - 05330041

Nos Robertus miseratione diuina cabilonensis episcopus et cabilonensis ecclesie decanus et capitulum et frater Hugo abbas totusque conuentus monasterii sancti Stephani diuionensis ordinis sancti Augustini lingonensis dyocesis notum facimus vniuersis quod cum inter nos cabilonensem episcopum ex vna parte et nos abbatem et conuentum predictos ex altera controuersia verteretur super eo quod nos abbas et conuentus predicti capellam seu domum de Breteneria cabilonensis dyocesis ad domum Dei de Brachons lingonensis dyosecis que ad nos et nostrum monasterium pleno iure spectare dinoscitur pertinere dicebamus nobis episcopo predicto dicentibus ex aduerso dictam capellam seu domum de Breteneria ad nos et cabilonensem ecclesiam ex certa causa pertinere tamdem bonis viris mediantibus dicta controuersia sic amicabiliter est sopita quod nos abbas et conuentus predicti pro nobis monasterio nostro et domo Dei de Brachons predicta totum ius quod in dicta domo seu capella de Breteneria iuribus et pertinenciis eiusdem nos seu domus Dei de Brachons predicta habebamus domino episcopo predicto ex causa quittauimus et quittamus quicquid iuris proprietatis et actionis habebamus seu habemus in ipsa in ipsum dominum episcopum et cabilonensem ecclesiam penitus transferentes et eidem garantire promisimus et promittimus contra omnes nostris sumptibus et expensis Nos vero prefatus episcopus pro bono pacis in recumpensationem predictorum et in religionis augmentum de consensu decani et capituli nostri predictorum habito super hoc inter nos pluries diligenti tractatu domui Dei de Brachons predicte parrochialem ecclesiam de Pruneriis cabilonensis dyocesis cum iuribus et pertinenciis eiusdem donauimus et donamus ab ipsa perpetuo possidendam ita quod dicti religiosi nomine domus Dei predicte fructus prouentus et exitus ipsius ecclesie percipiant et in vsus suos seu dicte domus Dei conuertant sic tamen quod hospitalitatem ibidem debitam tenere iura episcopalia soluere et alia onera quecumque ipsi ecclesie incumbencia supportare et ipsius ecclesie rectori sustentationem congruam ministrare teneantur ita etiam quod dicta ecclesia debito seruicio non fraudetur et quandocumque dictam ecclesiam vacare contingerit abbas sancti Stephani seu rector dicte domus Dei qui pro tempore fuerit nobis virum ydoneum regularem canonicum uel secularem quem malluerit ad curam dicte ecclesie presentet rectorem ad curam per nos instituendum in ipsa cui cum per nos institutus fuerit dicto abbati seu rectori domus Dei predicte tam de modo cure plebis quam de temporalibus respondere et rationem reddere teneatur concedimus etiam quod dictus abbas seu rector domus Dei predicte rectorem dicte ecclesie tam pro mala administratione quam pro excessibus quibuscumque possit in ipsius ecclesie parrochia corrigere et punire et cum facti qualitas exegerit ab ipsa ecclesia ex causa rationabili amouere saluo tamen quod si per dictum abbatem seu rectorem domus Dei dicte ecclesie rector in aliquo dicte ecclesie regimen contingente se grauari diceret tam per appellationem quam per simplicem querelam possit ad nos habere recursum super quo et eciam si in hospitalitate debita tenenda iuribus episcopalibus soluendis et aliis omnibus ipsi ecclesie imcumbentibus supportandis abbas seu rector predictus deficeret teneretur coram nobis super hoc stare iuri et nobis parere cum effectu correctione eciam visitatione et procuratione ratione visitationis debita et aliis iuribus quibuscumque nobis aut oscariensi archidiacono et decano rurali debitis et quod dicte ecclesie rector ad synodum sicut ceteri oscariensis archidiaconatus rectores venire et mandatis synodalibus et nostris parere teneatur saluis nichilominus et retentis prefatam autem ecclesiam a nobis sic dicte domui Dei de Brachons donatam et traditam promittimus dictis religiosis et dicte domui Dei modo et forma predictis habere licere et garantire contra omnes nostris sumptibus et expensis Nos uero abbas et conuentus predicti nomine nostre domus Dei de Brachons predicte prefatam ecclesiam de Pruneriis sic nobis et dicte domui Dei donatam acceptauimus et recepimus tenendam a nobis sub modo et forma predictis promittentes pro nobis et successoribus nostris administrationem seu regimen domus Dei de Brachons predicte gerentibus bonum statum dicte ecclesie seruare hospitalitatem consuetam et debitam in ipsa tenere jura tam episcopalia quam aliis quibuscumque ab ipsa ecclesia debita soluere et omnia onera ipsi ecclesie incumbencia supportare et super hiis et eciam super grauaminibus si que dicte ecclesie rector sibi per nos abbatem vel rectorem predictos circa premissa vel premissorum aliqua inferri diceret stare iuri coram domino cabilonensi episcopo prelibato et sibi parere quantum ad hec cum effectu et omnia premissa inuiolabiliter obseruare Nos vero decanus et capitulum cabilonensis ecclesie predicti considerantes donationem predictam de dicta ecclesia de Pruneriis prefate domui Dei seu dictis religiosis a domino episcopo predicto rite et ex causa rationabili factam esse habito super hoc inter nos pluries diligenti tractatu premissis omnibus consentimus et ea volumus ac eciam approbamus In quorum robur et testimonium nos episcopus abbas decanus capitulum et conuentus predicti sigilla nostra presentibus litteris et aliis litteris duplicatis duximus apponenda Datum die sabbati post dominicam qua cantatur quasimodo Anno domini millesimo trecentesimo terciodecimo