Charter Document - 05330037

Nous Huedes sires de Grancey faisons sauoir a touz que en nostre presence pour ce especialement estaubliz mess Aymes curiez de Migno prestres ha recogneu de sa bone volunte apanseement que il a done pour le remede des ames de son pere et de sa mere et de ses ancessours et de lame de lui en aumosne et en heritaige perpetuel a Deu et a leglise dou priorey de saint Germain de Grancey vne piece de prey seant ou finaige de Grancey ou leu que lon dit en Vaoiget et part a Lambelin de Grancey et as anfanz Jaquot Borrel et contient autour demee faucie par tel condition que li priours qui or est ou dit priorey et al qui pour le temps i seront sont et seront tenu si com dit li diz Aymes a faire chascun an a touz jourz mais en la dite eglise lanniuersaire pour les ames des diz pere et mere et ancessours dou dit Ayme et de lame dicelui Ayme apres son deces Et nous li dessus diz Huedes la donation et aumosne dessus dites volons loons outroions et confermons en tant comme il nous apertient et puet apertenir comme a seignour de la justice grant et petite et de la garde dou dit prey retenanz a nous et a nos hoirs la garde et la justice grant et petite sus le dit prey En tesmoingnaige de la quel chouse nous hauons mis nostre seaul en ces presentes lettres a la priere et a la requeste dou dit Ayme Ce fut fait en lan de grace mil trois cenz et douze le mercredi apres la feste de la Purification Nostre Dame