Charter Document - 05330027

Vniuersis presentes litteras jnspecturis nos frater Hugo humilis abbas et conuentus monasterii sancti Stephani de Dyuione ordinis sancti Augustini lingonensis diocesis Petrus decanus et capitulum capelle illustris principis domini ducis Burgundie de dicto Dyuione ad romanam ecclesiam nullo medio pertinentis notum facimus quod cum olim inter nos abbatem et conuentum predictos ex vna parte et nos decanum et capitulum prefatos ex altera super jntegritate cuiusdam prebende quam ecclesia sancti Stephani predicta habebat in dicta capella deseruiendo per canonicum regularem sancti Stephani predicti idoneum sacerdotem vocem tamen in capitulo dicte capelle et tractatibus ipsius non habentem necnon super perceptione fructuum primi anni prebendarum singulorum canonicorum eiusdem capelle decedentium quod ecclesia predicta sancti Stephani se dicebat habere debere et super decimatione quarundem vinearum dicte capelle existentium in territoriis decimalibus eiusdem ecclesie sancti Stephani ac etiam super jure habendi cimiterium et parrochiatum canonicorum presbiterorum et clericorum dicte capelle quod nos decanus et capitulum predicti nobis per priuilegia sedis apostolice vendicare intebamur et super quibusdam aliis articulis questio uerteretur cumque super hiis fuisset diutius alterquatum non sine magnis dictarum partium laboribus et expensis tandem per Dei gratiam mediantibus bonis viris ad compositionem et concordiam deuenimus prout continetur sigillatim in articulis infrascriptis si tamen placeat domino nostro sacrosancte romane ac vniuersalis ecclesie diuina prouidentia summo pontifici sine cuius auctoritate in hac parte nichil intendimus facere seu etiam attemptare quam quidem compositionem et concordiam supplicamus auctoritate sedis apostolice ex certa scientia confirmari conseruatoribus perpetuis ab eadem sede super hoc nobis datis jn primis ut dissensionis materia quam bonorum et rerum communio seu permixtio inter ipsas ecclesias sancti Stephani et dicte capelle suscitare consueuit eorum discreta separatione tollatur nos abbas et conuentus predicti monasterii prebendam quam habebamus in dicta capella et fructus primi anni canonicorum ipsius capelle decedentium ac etiam partem illam et totum jus quod habebamus et percipiebamus in venta Dyuionis et sextariis et pertinentiis eorundem que quidem sextaria a vendentibus vina in villa dyuionensi percipere consueuimus necnon decem libras cere annui redditus nobis et ecclesie nostre beate Marie dyuionensis ad nos pleno jure et in proprios vsus pertinenti debitas quas decem libras cere soluere promittimus pro eisdem et expendere ad opus luminaris ecclesie beate Marie predicte prout inibi fieri consueuit ac triginta tres solidos et quatuor denarios monete dyuionensis quos ipsa capella pro anniuersario magistri Columbi annuatim debebat nobis et nostro monasterio prelibato ac decem et nouem denarios diuionenses quos percipere consueuimus supra mansum qui fuit Renaudi Pautin situm extra muros diuionenses in vico des noiroz item duodecim solidos diuionenses censuales quos percipiebamus apud Orgeux predictis decano et capitulo ac eidem capelle damus cedimus concedimus remittimus imperpetuum et quictamus jn recompensationem vero premissorum Nos decanus et capitulum capelle predicte banna nostra venditionis vinorum in villa diuionensi que singulis annis incipiunt in crastino festi Circuncisionis Domini percipienda et habenda ab ipsis cum omni jure et emolumento dictorum bannorum per totum tempus quo percipere et habere consueuimus temporibus retroactis ac etiam annuos redditus infrascriptos in quibus nobis et dicte capelle abbas et conuentus et ecclesia sancti Stephani tenebantur videlicet viginti sex solidos et octo denarios diuionenses super quandam vineam quam habent jn finagio de campo Euurardi item sex solidos et octo denarios diuionenses pro magistro Nycholao quondam decano capelle super quandam domum sitam in vico sancti Michaelis diuionensis item octo solidos et quatuor denarios dicte monete sitos super domum dictorum abbatis et conuentus que fuit Odonis quondam decani Christianitatis diuionensis item quadraginta solidos parisienses in quibus dicti abbas et conuentus tenebantur capellanie altaris beate Marie Magdalene fundate in capella nostra predicta sitos super vineam dictorum abbatis et conuentus que est ante portam de Talento item tresdecim solidos et quatuor denarios diuionenses nobis super furnum sancti Michaelis pro Johanne quondam decano diuionensi et alios tresdecim solidos et quatuor denarios pro magistro Johanne quondam decano dicte capelle super eundem furnum debitos ac etiam quinquaginta nouem solidos de quatuor libris diuionensibus quas super dictum furnum habebamus viginti vnum solidos de dictis quatuor libris tantummodo nobis et capelle nostre predicte retinentes predictis abbati et conuentui et ecclesie sancti Stephani damus cedimus concedimus remittimus jmperpetuum et quittamus cum omni jure et emolumento omnium premissorum quicquid juris possessionis et proprietatis habemus seu habere possumus et debemus in premissis et premissorum singulis in ipsos abbatem et conuentum et ecclesiam sancti Stephani totaliter transferentes Preterea ecclesia sancti Stephani predicti non tenebitur ad seruitium faciendum in dicta capella quod pro dicta prebenda facere tenebatur verum predicta capella habebit curam et parrochiatum ducis et ducisse Burgundie prout in priuilegiis sedis apostolice continetur habebunt etiam pro bono pacis prenominati decanus et capitulum et predicta capella curam et jus parrochiatus decani canonicorum ipsius capelle et quadraginta personarum dumtaxat tam presbiterorum quam clericorum existentium de choro dicte capelle et morantium infra fines parrochiarum sancti Stephani predicti familiares tamen et seruientes decani canonicorum presbiterorum et clericorum quadraginta predictorum et morantes cum ipsis infra limites parrochiarum ecclesie predicte sancti Stephani nisi fuerint canonici uel de numero predicto erunt parrochiani illius ecclesie in cuius parrochiatu morabuntur Nomina predictorum quadraginta presbiterorum et clericorum quos predicti decanus et capitulum in parrochianos suos duxerint assumendos tradentur in scriptis ex parte capituli sub sigillo capituli dicte capelle nobis abbati aut nostro successori uel priori claustrali eiusdem loci aut locum tenenti dicti prioris et de hoc ille de predictis tribus scilicet abbate priore uel eius locum tenente cui dicta nomina in scriptis fuerint tradita tradet suas patentes litteras sub sigillo suo dicti capituli litteras offerenti si autem predicti tres videlicet abbas prior aut eius locum tenens aut vnus ipsorum presentes non essent in ecclesia offerentur et tradentur dicta nomina in scriptis sub sigillis quibus supra ebdomadario magne misse et extunc sic traditi et nominati pro parrochianis capelle habebuntur predicti autem tres uel alter ipsorum cum presentes fuerint litteras suas nichilominus super oblatione et nominatione predictis tenebuntur tradere requisiti et quandocunque alterum dictorum quadraginta mori religione proficeri matrimonium aut sponsalia contrahere canonicum capelle fieri a choro dicte capelle priuari sine fraude uel eidem choro renuntiare aut extra parrochiatus ecclesiarum sancti Stephani predicti per annum moram traxisse contigerit loco illius deffuncti religione professi vxorati in canonicum assumpti a choro priuati vel eidem choro renunciantis aut qui extra parrochiatus ecclesiarum sancti Stephani per annum moram traxerit et non alius debebit et poterit a dictis decano et capitulo alius subrogari Sed donec subrogatio predicta abbati uel priori claustrali seu eius locum tenenti ex parte capituli sub sigillo capituli significata fuerit dicta ecclesia sancti Stephani jus parrochiale in subrogato huiusmodi retinebit si vero aliquis de numero quadraginta predictorum choro dicte capelle renuntiauerit uel ab eodem priuatus fuerit de voluntate decani et capituli predictorum si postmodum infra fines parrochiatuum sancti Stephani ipsum morari contigerit erit parrochianus illius ecclesie in cuius parrochiatu morabitur nec in dictum numerum quadraginta poterit decetero reassumi sed ille qui per annum extra dictos parrochiatus manserit si post ea reuertatur mansurus in aliquo parrochiatu ecclesiarum sancti Stephani predicti erit parrochianus illius ecclesie in cuius parrochiatu morabitur sed tamen poterit in parrochianum dicte capelle reassumi et eodem modo coniugatus rediens ad clericatum et ad chorum supradictum jta tamen quod in nullo casu dicti decanus et capitulum plures parrochianos habeant quam quadraginta predictos jmmo eo ipso quod ipsi decanus et capitulum alicui de numero predicto moranti infra fines parrochiatuum ecclesiarum sancti Stephani non facto canonico dicte capelle alium subrogauerint ille cui facta fuerit subrogatio erit parrochianus illius ecclesie sancti Stephani in cuius parrochiatu morabitur matrimonium etiam aut sponsalia contrahens de numero predicto morans infra parrochiatus sancti Stephani predicti eo ipso erit parrochianus sancti Stephani jtem aliquem in infirmitate iacentem propter quam sine periculo non possit ire ad dictam capellam non poterunt iidem decanus et capitulum in parrochianum suum assumere aut alii subrogare Item prenominati decanus et capitulum habebunt cimiterium eo modo quo melius de jure habere poterunt et debebunt pro duce Burgundie ducissa decano canonicis et quadraginta antedictis ac etiam pro omnibus aliis qui ibidem elegerint sepeliri jta tamen quod parrochiani ecclesie sancti Stephani seu ecclesiarum pertinentium ad eandem et extranei in dictarum ecclesiarum parrochiatibus decedentes qui in capelle predicte cimiterio elegerint sepeliri antequam deferantur ad dictam capellam presentari debebunt in ecclesiis quarum parrochiani erant seu in quarum parrochiatibus decesserunt et ibidem celebrabuntur missarum solemnia pro eisdem hora qua misse parrochiales consueuerunt celebrari apud Dyuionem vel ante habebit etiam dicta ecclesia sancti Stephani pro parrochianis suis et ecclesiarum suarum in dicte capelle cimiterio eligentibus sepeliri oblationes legata beneficia et debita que pro parrochianis suis decedentibus fieri dari recipi et exigi consueuerunt et omnia ea que cum funere ad suas ecclesias deferentur sicut de illis et pro illis qui apud fratres predicatores vel minores eligunt sepeliri De legatis vero dicte capelle relictis et funeralibus que cum funere portabuntur ad dictam capellam et de oblationibus ibidem factis nullam habebit dicta ecclesia sancti Stephani portionem decanus vero et canonici dicte capelle presbiterique et clerici ipsius capelle qui fuerint de numero supradicto qui in monasterio sancti Stephani predicti uel in ecclesiis aut cimiteriis ad ipsum pertinentibus suam elegerint sepulturam antequam deportentur ad ecclesias in quarum cimiteriis elegerint sepeliri portabuntur ad dictam capellam et demum pro ipsis hora predicta diuino offitio celebrato portabuntur ad ecclesias in quarum cimiteriis elegerint sepeliri De funeralibus vero que deferentur ad ipsas ecclesias uel legatis eisdem relictis nichil percipient decanus et capitulum antedicti capellani etiam et clerici dicte capelle qui non fuerint de dicto numero quadraginta et qui in dicte capelle cimiterio non eligerint sepeliri cum predicti decanus et capitulum in ipsis nullum jus habere possint parrochiale aut debeant jmmo sint et esse debeant parrochiani ecclesiarum sancti Stephani in quarum parrochiatu uel parrochiatibus morabuntur non deferentur ad dictam capellam nisi qui decesserint ad eandem capellam petierunt aportari quod si petierint prelibati decanus et capitulum aut quiuis alius de hiis que cum funere deportabuntur nichil poterunt retinere nisi defunctus aliud duxerit ordinandum si vero in eadem capella elegerint sepeliri antequam deferantur ad capellam eandem presentabuntur in ecclesiis in quarum parrochiatibus morabuntur et fiet in hoc casu sicut in ceteris parrochianis sancti Stephani predicti uel ecclesiarum suarum extra cimiteria propriarum ecclesiarum eligentibus sepeliri prout superius est expressum Item vinee domus et cellaria acquisita a quadraginta annis et infra et imposterum acquirenda et etiam vinee capellaniarum in dicta capella fundatarum et fundandarum nisi fuerint de vineis que erant de generali tempore compositionis olim facte inter partes predictas et ecclesias memoratas per dominum Honorium papam III confirmate ac etiam vinee quas singulares canonici capellani presbiteri et clerici dicte capelle quoquomodo tenent aut tenebunt aliunde quam ratione dicte capelle in finagiis censualibus uel decimalibus ecclesie sancti Stephani predicti soluent eidem ecclesie sancti Stephani census et decimas nec super hoc ratione dicte capelle aliquam immunitatem habebunt vinee autem domus et cellaria que habebat dicta capella quoquomodo ac quadraginta annis et supra immunitatem habebunt a censu et decimis hoc saluo quod coloni et alii qui ad firmam uel ad admodiationem tenebunt uel excolent dictas vineas de fructibus quos inde percipient decimas soluent ecclesie sancti Stephani deducta inde prius libere portione quam habebunt illi de capella de fructibus memoratis nec super hoc deffendentur dicti coloni seu ad firmam vel ad admodiationem tenentes uel excolentes per decanum canonicos presbiteros et clericos antedictos Ordinatum est etiam inter nos quod si aliquas compositiones habeamus premissis contrarias in quantum eis aduersantur nullius fuit valoris et quod alie sint in suo robore durature Hanc autem compositionem nos abbas et conuentus sancti Stephani decanus et capitulum capelle supradicte promictimus adinuicem bona fide et sub obligatione omnium bonorum ecclesiarum nostrarum tenere perpetuo et inuiolabiliter obseruare si ipsam impetrare potuerimus per sedem apostolicam confirmari quam etiam confirmationem bona fide promittimus et tenemur ex pacto adinuicem pro viribus procurare jn quorum omnium testimonium et munimen hiis presentibus litteris sigilla nostra duximus apponenda Datum XVII die mensis marcii anno jncarnationis domini millesimo trecentesimo vndecimo