Charter Document - 05325007

Bonifacius episcopus seruus seruorum Dei dilectis filiis decano Sedelocensi Eduensis diocesis et magistro Petro de Sinemuro Eduensi et Bartholomeo de Bosco Cabilonensis canonicis ecclesiarum salutem et apostolicam benedictionem In causa appelationis et negocii principalis que inter dilectos filios abbatem et conuentum monasterii Sancti Stephani de Diuione Lingonensis diocesis ex una parte et decanum et capitulum capelle ducis Burgundie eiusdem loci de Diuione ex altera dicti diocesis super quibusdam iuribus parrochialibus et aliis diuersis articulis uertitur uenerabilem fratrem nostrum B episcopum Eduensem tunc decanum Pictauensem capellanum nostrum concessimus partibus auditorem Sane super libellis hinc inde porrectis inter Raynaldum de Monte Antelini procuratorem abbatis et conuentus et Andream de Piperno procuratorem decani et capituli predictorum lite in ipsius auditoris presencia legitime contestata de calumpnia et ueritate dicenda prestitis iuramentis factis positionibus et ad earum aliquas responsionibus subsecutis formatis insuper et datis articulis hinc et inde ac super ipsorum articulorum pertinencia et impertinencia aliquandiu disputato memoratus auditor quosdam ex articulis utriusque partis prout erant propositi quosdam uero uerbis aliquibus de tractis ex eis per interlocutoriam suam quam super hoc promulgauit in scriptis admittens aliquos simpliciter alios uero qua ad certum effectum per interlocutoriam supradictam repulit et reiecit Cumque per eumdem Andream procuratorem decani et capituli predictorum fuisset ab eadem interlocutoria in eo quod contra partem suam lata fuerat ad nostram audienciam appelatum Nos causam huiusmodi appelationis ab eadem interlocutoria interiecte ac negocii principalis magistro Bernardo Roiardi canonico Xanctonensi capellano nostro nostrique palatii auditori causarum audiendam commisimus et fine debito terminandam qui demum post processus aliquos coram eo super hoc habitos auditis et plenius intellectis rationibus partium predictarum in aliquibus dictam interlocutoriam infirmauit et in reliquis confirmauit eandem Uerum quia per ea que coram auditoribus prelibatis in huiusmodi causa sunt habita non potest de huiusmodi principalis cause meritis apud sedem predictam plene liquere discretioni nostre de utriusque partis procuratorum assensu per apostolica scripta mandamus quatinus apud dictum Diuionem ab eodem abbati ac aliquibus de dicto conuentu habentibus ab eodem conuentu super hoc sufficiens et speciale mandatum necnon ab eodem decano et aliquibus de dicto capitulo habentibus ab eodem capitulo similiter sufficiens et speciale mandatum iuramento de ueritate dicenda recepto ipsos positionibus per procuratores easdem negatis et illis quibus non est sufficienter responsum faciatis plenarie respondere eos ad id et ad prestandum huiusmodi iuramentum necnon conuentum et capitulum prelibatos ad mandatum huiusmodi faciendum si necesse fuerit monitione premisso per censuram ecclesiasticam appelatione post posita compescendo Ac deinde testes litteras et instrumenta que utraque partium predictarum super earum articulis quos prefatus magister B una cum positionibus et interrogatoriis ipsarum partium uobis sub sigillo suo transmittit inclusos coram vobis duxerint producenda infra quatuor mensium spacium post receptionem presentium recipiatis solerter litteras et instrumenta predicta transcribi fideliter faciendo ac testes ipsos iuxta eadem interrogatoria fideliter examinare curetis Si uero alterutra dictarum partium testes partis alterius uoluerit reprobare uos testes qui super reprobatione huiusmodi producti fuerint coram uobis infra unius mensis spacium predictos quatuor immediate sequentis sollicite recipere ac iuxta interrogatoria uobis a partibus exhibenda si ea exhibere uoluerint Alioquin secundum datam uobis a Deo prudenciam examinare cum diligentia studeatis dicta omnium testium predictorum ac responsiones quas ad positiones predictas fieri contigerit fideliter in scriptis redacta una cum transcriptis litterarum et instrumentorum eorumdem necnon positionibus articulis et interrogatoriis supra dictis sub uestris inclusa sigillis ad nostram presenciam quantocius transmissuri ac significaturi nobisque et quanta fides eisdem testibus litteris et instrumentis fuerit adhibenda Prefixo partibus termino peremptorio competenti quo per se uel procuratores ydoneos cum omnibus actis iuribus et munimentis causam huiusmodi contingentibus nostro se conspectui representent iustam dante domino sentenciam recepture Diem uero prefixionis huiusmodi et quiquid inde duxeritis faciendum nobis per uestras litteras harum seriem continentes fideliter intimare curetis Testes autem qui fuerint nominati si se gracia odio uel timore subtraxerint censura simili appelatione cessante compellatio ueritati testimonium perhibere Quod si non omnes hiis exequendis potueritis interesse duo uestrum ea nichilominus exequantur Datum Laterani IV idus decembris pontificatus nostri anno quinto