Charter Document - 05321036
Charter Number: | 05321036 |
---|---|
Cartulary Title: | Chartes de l'Abbaye de Saint-Etienne de Dijon. Chartes des années 1300-1309. |
Charter Language: | Latin |
Charter Origin: | Lay |
Charter Type(s): | Will |
Date: | 1304 |
Date type: | Internal, A.D., Feast |
Resource Link(s): |
Reference Document for this Embedded Document |
Charter:
In nomine sancte et indiuidue Trinitatis Patris Filii et Spiritus Sancti amen Cum propter delictum primi parentis generis humani successio quelibet fit transitoria et mortalis et quilibet sit certus de morte et de hora tamen mortis incertus idcirco ego Iohannes dictus Chasteleine de Dyuione clericus filius quondam Iacobi dicti Chasteline burgensis quondam Dyuionis per Dei gratiam sanus mente licet infirmus corpore timensque se propter mundi pericula que cothidie eminent decedam intestatus et etiam uolens et cupiens saluti anime mee et antecessorum meorum necnon tranquillitati et paci heredum seu successorum meorum salubriter et secundum Deum prouidere de me bonis et rebus meis dispono et ordino et testamentum meum seu ultimam uoluntatem meam facio in hunc modum Et quia non habeo nisi tria scilicet spiritum corpus et res primo et specialiter spiritum meum commendo nunc et imperpetuum in manus domini nostri Dei Ihesu Christi ut ad eum qui creauit illum reuertatur Sepulturam autem corporis mei eligo in cimiterio Fratrum Minorum Dyuionis et ibidem predictum corpus meum quam cito ipsum ab hoc seculo decedere contingerit prius diuinis officiis pro remedio anime mee et antecessorum meorum more ecclesiastico celebritatis omnibusque aliis pactis que in sacrosancta Dei ecclesia in exequiis fidelium fieri consueuerunt uolo et precipio humo tradi de qua formatum est in cinerem redigendum et iterum in die iuditii resurgendum recepturumque cum Christo gloriam sempiternam Et uolo quod super corpus meum ponatur quedam lapis in qua nomen meum scribatur Preterea uolo et precipio quod clamores mei et debita mea legitime probati et probata per manus exequtorum meorum inferius nominandorum pacificentur et reddantur Item do et lego Fratribus Minoribus antedictis centum solidos pro pittancia die obitus mei eisdem facienda Item eisdem Fratribus do et lego unum de meis cyphis argenteis pro quodam calice conficiendo Item do et lego eisdem Fratribus lectum meum comunitum Item do et lego fratri Dominico de ordine Fratrum Predicatorum uiginti solidos fratri Galthero de Besua eiusdem ordinis uiginti solidos fratri Galthero de Mailleyo uiginti solidos Item do et lego conuentui Sancti Stephani Dyuionensis uiginti solidos de annuo et perpetuo redditu pro anniuersario meo annis singulis tercia die festi Omnium Sanctorum in eorum ecclesia faciendo et dictos uiginti solidos dicto conuentui assideo et assigno super domum meam quam tenent Nicholaus et Dominicus dicti Poyssenoz fratres sitam in Doliaria Sancti Michaelis Et uolo quod super dicto legato detur eisdem instrumentum una cum instrumento acquisitionis quam feci de uiginti solidis supradictis Item do et lego conuentui Sancti Stephani predicti die obitus mei pro pictancia sexaginta solidos Item do et lego Fratribus Predicatoribus de Dyuione quadraginta solidos conuentui Sancti Benigni de Dyuione quadraginta solidos pro pictancia die obitus mei dicto conuentui facienda Item do et lego canonicis presbiteris et clericis capelle domini ducis de Dyuione triginta solidos die obitus mei distribuendos inter ipsos Item do et lego cuilibet hospitali de Dyuione pro pictancia pauperum decem solidos Item do et lego pauperis primitiuis scolarum Dyuionis decem solidos pro distribuendo pane die obitus mei inter ipsos leprosis leprosarie Dyuionis decem solidos Item do et lego uicario meo Sancti Nicholai quinquaginta solidos Domino Galthero presbitero uiginti solidos Domino Petro in ecclesia Sancti Nicholai desseruienti decem solidos clerico dicte ecclesie tres solidos Item do et lego operi ecclesie capelle ducis de Dyuione decem solidos Item do et lego dicto Stephano Lamberti et heredibus Iohannis Lamberti duo iornalia uinee sita in finagio de Poilleyo in loco ubi dicitur en la Ferrere iuxta uineam Iohannete sororis mee que quidem duo iornalia habui a dompna Iuhanna Uoone quondam matrita mea Et uolo quod equaliter diuidantur ita quod dictus Stephanus habeat unum iornale et dicti habeant unum iornale Item do et lego dicto Stephano Lamberti minorem de cupis meis argenteis Item do et lego Andree fratri meo pullum meum Item do et lego Iohanne sorori mee duas caudas uini puri et duas caudas uini pro familia et tres eminas frumenti et pannum meum de persico quem habui a domino de Pesuis et unam pennam de cirograllis Item do et lego Iohanni fratri meo sexaginta solidos Petronille filie Iornot unam de uestibus meis forratam de cendalio Adeline pedicete mee unum de supertunicalibus forratum de cendalio Ysabelli nutrici mee aliud supertunicale forratum de cendello Item do et lego dicto Cornuot clauserio meo garnoichiam de persico albo forratam et unam de tunicis meis Item do et lego dicto Pergent seruienti meo uiginti et quinque solidos Item uolo et precipio quod casus iusticie quos penes me habeo restituantur magistro Iohanni de Dompna Petra Item uolo quod instituta quam penes me habeo sine aparatu restituantur Guillermo filio Guillermi de Corcellis solutis prius heredibus meis uiginti solidis Turonensium argenteis Item uolo et precipio quod uiginti et quinque solidi pariter restituantur Iohanni de Camberti ciui Aurilianensi aut eius heredibus Et uolo quod mittantur per aliquem secularem de partibus istis Item uolo quod domina de Chargeyo et eius filii habeant medietatem debiti in quo michi tenetur domina Isabellis domina de Tylicastro Et quia recepi uiginti quinque libras de debito in quo michi tenebatur uolo quod restituantur eisdem duodecim libre et decem solidi ita quod ipsa domina de Chargeyo cum filiis suis habeant de dicto debito quinquaginta libras Item do et lego Regnaudo lou Roquet de Besua uestem meam de camilino foratam de cyrogrellis Item et do et lego uxori eius supertunicale meum de violeta cum capucio Item do et lego ecclesie Sancti Petri de Besua uiginti solidos annui et perpetui redditus pro anniuersario meo annuatim in dicta ecclesia faciendo uidelicet illos uiginti solidos reddituales quos acquisiui a Dominico de Pasques et ab eius uxore Et uolo quod dicte ecclesie detur super hoc instrumentum cum instrumento dicti aquisitus Item do et lego conuentui eiusdem loci pro pictancia die obitus mei quinquaginta solidos Item do et lego Bartholometo de Saffris decem libras Iohanni filiolo meo filio Michaelis de Bera uiginti solidos predictis autem omnibus et singulis pacificatis penitus et solutis in residuo omnium bonorum meorum heredem meum instituo Huguetam filiam meam carissimam Huius autem mei testamenti dispositionis et ordinationis omnium predictorum exequtores meos facio dilectos meos Stephanum Lamberti predictum et Andream dictum Chastelaine fratrem meum in quorum manibus pono et delibero omnia bona mea mobilia et immobilia quecunque et ubicumque sint et in ipsos et quemlibet ipsorum transfero omnia iura ad me pertinencia et omnes actiones ad me pertinentes ita uidelicet quod ipsi uel unus ipsorum dicta bona possint auctoritate sua propria uendere distrahere occupare uel alienare in toto uel in parte absque contradictione pro predictis clamoribus debitis et legatis meis pacificandis et soluendis Et propter hoc de dictis omnibus bonis meis iuribus et actionibus ad me pertinentibus me et heredes meos deuestio et dictos exequtores meos et quemlibet ipsorum corporaliter inuestio de eisdem pro predictis omnibus et singulis exequendis Et uolo quod possint facere omnia quecunque facere possem si uiuerem Et si dicti duo exequtores mei ad predicta exequenda insimul interesse noluerunt uel non potuerunt tamen uolo et precipio quod unus ipsorum predicta omnia nichilominus ad expensas bonorum meorum totaliter exequatur de quibus expensis non teneatur alteri reddere rationem sed credatur suo simplici uerbo Preterea uolo et precipio quod me sublato de medio per manus exequtorum meorum predictorum aut unus eorundem fiat estimatio de omnibus bonis meis et super hoc fiat inuentorium ita quod ille penes quem dicta bona remanebunt caueat ydonee de restituendo bona predicta predicte Huguete filie mee aut eius heredibus loco et tempore compotenti Hoc autem meum testamentum et hanc meam ultimam uoluntatem solam et unicam omni alia reuocata si aliquam feci uolo ualere iure testamenti inscriptis uel iure testamenti nuncupatini seu iure codicillorum uel iure ultime uoluntatis Et si non ualent secundum leges uolo quod ualeant secundum canonicas sanctiones si non ualent et ualet testamentum uel ultima uoluntas tamen uolo quod ualeant iure donationis inter uiuos aut alio iure modo forma et consuetudine quibus melius ualere poterunt et debebunt omni legum subtilitate et rigore iuris postpositis penitus et remotis Et uolo me et heredes ac exequtores meos compelli ad predicta omnia tenenda adimplenda et inuiolabiliter obseruanda quasi ex re adiudicata per curiam domini ducis Burgondie cuius iuridicioni quo ad hoc suppono me et heredes ac exequtores meos et omnia bona mea quecunque sint In quorum omnium predictorum testimonium litteris istis seu huic presenti testamento sigillum dicte curie rogaui et supplicaui apponi Actum et datum in presentia Perreneti filii quondam Iohannis Lothoringi clerici coadiutoris Hugonis de Cabilone notarii Diuionis Iohannis dicti Penrot Richardi dicti le Paaigre et Herberti filii Guioti Combellani de Besua testium ad hoc a me specialiter uocatorum die Iouis post festum Beati Mathei apostoli anno Domini millesimo trecentesimo quarto