Charter Document - 05320057

Nous Iehans des Granges baillis de Digenois facons sauoir a touz cels qui uerront ces lettres que par la uertu d'une lettre saelee dou seaul de clere memoire Hugues iadis duc de Bourgoigne en la quele nous hauons uehu contenir que messires li dux recognoit et promet quil ne puet en aucun leu de son duchaume retenir a soi les hommes es religioux de Saint Estienne de Digeon de lour vile que l'on appele Uile souz Giure Nous hauons renduz et deliurez et rendons et deliurons es diz religioux Perrot le Chapuis et ses enfanz hommes des diz religioux bien quil se estient desauoe daux et hauoe hommes monsoignour le duc en la uile et leu de franchise de Flaige si cum lon dit ensemble lour biens estanz en la dicte Uile souz Giure et disons et hauons dit que la cognoissance des diz hommes et la recreance des diz lor biens appartient es diz religioux nonobstant le dit hauou fait a monsoignour le duc et le dit monsoignour le duc non pouuoir retenir a soi les diz hommes ne hommes ne borgois Done souz le seaul es causes de nostre court le iuedi deuant la feste saint George lan de grace mil IIIc et sept