Charter Document - 05320045

Uniuersis presentes litteras inspecturis officialis Lingonensis salutem in Domino Noueritis quod in presencia Iohannis de Dyuione clerici dicti de Poillenayo mandati nostri iurati ad hoc specialiter deputati Gillotus maior de Fixins et Hugo frater suus propter hoc personaliter constituti confessi sunt sponte et prouide se retinuisse ad firmam seu ad censam a uiro religioso fratre Theobaldo abbate Ongiaci ordinis Sancti Augustini Eduensis dyocesis ad uitam ipsorum fratrum et ad uitam alterius superuiuentis ex ipsis solum modo duas uineas desertas continentes circiter quatuor iornalia sitas in finagio de Fixins ubi dicitur Au Crai Aguloin quarum una sita est iuxta uineam Oduni dicti Ploutenet ex una parte et filie dicte Borbii et alia iuxta leproxariam inter uineam citeruensem et uiam publicam pro duobus modiis et dimidio uini muscali boni et puri ad mensuram Dyuionensem Quod uinum tenentur et promiserunt dicti fratres per iuramenta sua super sancta Dei euangelia corporaliter prestita et sub obligatione omnium bonorum suorum reddere et soluere abbati predicto uel mandato suo aut eius successoribus apud Fixinum in racemis bene maturis tempore uendemiarum omnis singulis tempore uite sue et superuiuentis solummodo promiserunt insuper dicti fratres uel superuiuens eorum predictas uineas desertas bene et fideliter excolere et edificare ad uineam readucere et in bono statu dimittere Alioquin uoluerunt fratres predicti aut alterius superuiuens quod si in premissis aut aliquo premissorum deficiunt uel defecerunt superuiuens quod dictus abbas uel eius successor ad predictas uineas recurrant et eas teneant et ex hiis fructus suos faciant usque ad integram satisfactionem omnium premissorum Uoluerunt insuper predicti Gillotus et Hugo fratres aut superuiuens compelli ad premissorum obseruanciam per nos uel per officialem Lingonensem qui pro tempore fuerit per censuram ecclesiasticam tanquam ex re adiudicata in curia Lingonensi cuius iuridictioni quo ad hoc supposuerunt se et sua In quorum testimonium ad requisitionem supra dictorum fratrum nobis factam pro ipsis per dictum iuratum nostrum qui nobis predictam retulit et cui quantum ad hoc et maiora fidem plenissimam adhibemus sigillum curie Lingonensis presentibus litteris duximus apponendum Datum presentibus Uincentio dicto Gaidot et Girardo dicto de Bennuis testibus ad hoc uocatis et rogatis die Martis post Bordas anno Domini millesimo trecentesimo quinto Iohannes de Poillenayo ita est