Charter Document - 05320041

Nos frater Hugo humilis abbas totusque conuentus Sancti Stephani et nos frater Iohannes de Uillers prior totusque conuentus Sancti Benigni Dyuionensis notum facimus uniuersis quod cum olim pro pace et dilectione mutua inter nostras iam dictas ecclesias conseruanda statutum seu ordinatum fuerit inter ipsas quod si aliquid controuersie littis uel greusie inter ipsas ex quacunque causa emerserit per duos bonos de dictis conuentibus per dictas ecclesias assumendos negotium terminetur et quod per ipsos ordinatum fuerit firmum et stabile permaneat in futurum Si uero in unam sententiam non potuerunt conuenire ad abbates qui preerunt negotium reportabunt qui si de sententia ferenda uel de pace facienda conuenire non potuerint remittent eandem causam in statu in quo erit ad dominum episcopum Lingonensem qui pro tempore fuerit et quicquid idem episcopus super eadem pace uel iudicio dixerit uel terminauerit inter partes firmiter obseruabunt Nos predecessorum nostrorum uestigiis inherere uolentes super omnibus causis querelis greusiis et controuersiis quas habemus uel habebimus ad inuicem hinc ad festum Omnium Sanctorum proximo uenturum terminandis fratrem Iohannem elemosinarium Sancti Benigni et fratrem Poincardum priorem Mirabelli iuxta compositionem seu ordinationem premissam duximus assumendos Dantes eisdem potestatem cognoscendi super omnibus et singulis causis querelis et controuersiis inter nos ortis et usque ad dictum festum Omnium Sanctorum oriundis et ipsas decidendi stando sedendo omni die omni hora diebus feriatis et non feriatis utraque parte presente uel altera seu eius procuratore per contumaciam assente ordine iudiciario seruato uel penitus pretermisso et in aliquibus seruato et in aliquibus pretermisso et si ordine iudiciario seruato cognoscere inceperint possint ordine iuris non seruato cognoscere et econuerso Uolentes quod quam primum de aliquo articulo eisdem licuerit illum possint et debeant terminare ad alios postmodum processuri Si uero quod absit omnes causas et questiones predictas uel earum aliquas infra festum Omnium Sanctorum proximo uenturum usque ad quod festum eorum potestatem durare uolumus terminare nequiuerint id quod per ipsos terminatum non fuerit ad abbates dictorum monasteriorum si interim monasterio Sancti Benigni dominus prouiderit de abbate alioquin ad dictum abbatem Sancti Stephani et priorem Sancti Benigni referatur qui sicut premissum est super hiis que ad ipsos relata fuerint infra festum Natalis Domini proximo uenturum cognoscere poterunt ac etiam terminare Et quod per ipsos decisum non fuerit ad reuerendum in Christo patrem dominum Lingonensem episcopum secundum tenorem compositionis seu ordinationis premisse referetur per ipsum pace uel iudicio terminandum Promittentes ad inuicem sub uoto religionis nostre nos partes antedicte nos facere et tenere et inuiolabiliter obseruare quicquid per elemosinarium et priorem Mirabelli uel per abbates seu abbatem et priorem Sancti Benigni predictos aut per dictum dominum episcopum super premissis et singulis premissorum fuerit ordinatum uerum cum monasterium Sancti Benigni predictum sit abbatis regimine destitutum propter quod timeri posset ab aliquibus ne quod cum ipso seu contra ipsum fieret esset inualidum Nos frater Iohannes prior totusque conuentus Sancti Benigni supradicti non animo recedenti a compositione seu ordinatione a predecessoribus nostris facta quam uolumus et protestamur in omnibus imposterum obseruare ad maiorem cautelam premissorum promittimus sub pena centum marcarum argenti alteri parti applicanda nos facturos et curaturos quod cum abbas in nostro dicto monasterio creatus fuerit una cum conuentu suo ratificabit tenebit et faciet omnia et singula supradicta Nos etiam frater H abbas totusque conuentus Sancti Stephani supradicti sub eadem pena alteri parti applicanda promittimus facere et tenere omnia premissa et singula premissorum pro qua pena si eam committi quod absit contigerit ego Galtherus de Boux dictus de Sancto Benigno ad requisitionem cuiuslibet partis et in manu utriusque partis in casu in quo sibi dicta pena deberetur me fideiussorem constitui et principalem redditorem Promittentes bona fide nos partes antedicte predictum Galterum super fideiussione predicta indempnem obseruare quelibet pars in quantum pro ipsa fideiussit In cuius rei testimonium nos frater H abbas totusque conuentus Sancti Stephani et nos frater Iohannes prior totusque conuentus Sancti Benigni ac ego Galtherus de Boux predictus sigilla nostra presentibus litteris duximus apponenda Datum die Mercurii post festum Assumptionis Beate Marie Uirginis anno Domini millesimo trecentesimo quinto