Charter Document - 05320027
| Charter Number: | 05320027 |
|---|---|
| Cartulary Title: | Chartes de l'Abbaye de Saint-Etienne de Dijon. Chartes des années 1300-1309. |
| Charter Language: | Latin |
| Charter Origin: | Religious |
| Charter Type(s): | Permission |
| Date: | 1304 |
| Date type: | Internal, A.D. |
| Resource Link(s): |
|
Charter:
In nomine Domini amen Anno incarnationis eiusdem millesimo trecentesimo quarto mense maii ego Melina uxor quondam Gorleti de Aqueductu defuncti nunc uxor Hugonis filii Iohannis Robeleti de Salione notum facio uniuersis presentibus et futuris quod cum ego celebrato matrimonio inter me et dictum Hugonem nunc maritum meum una cum ipso me transtulerim ad dominium de Salione propter quod dominus abbas Sancti Stephani Dyuionensis domos ortos et uineas et omnia alia bona mobilia et immobilia in uilla et finagio Aqueductus sub districtu et dominio dicti abbatis et ecclesie sue existencia que fuerunt dicti Gorleti primi mariti mei et mea ratione dotis capi et sasiri fecisset dicens et asserens quod predicta bona sibi talliabilia et explectabilia propter quam ad aliud dominium me transtuleram ratione dotis aut tutele seu aduerie liberorum meorum a dicto Gorleto a me susceptorum secundum consuetudinem Burgondie tenere non poteram nec debebam sed sibi et ecclesie sue inciderant in commissum Tandem dictus abbas amicorum meorum deuictus precibus et erga me et dictos liberos meos misericordia motus de gratia speciali uoluit et consensit quod ego nomine meo et dictorum liberorum meorum predicta bona in predictis uilla et finagio existencia teneam et possideam et excoli faciam usque ad quinque annos a confectione presentium immediate sequentes sub conditionibus supra scriptis uidelicet quod ego teneor pro predictis bonis reddere et soluere anno quolibet dictorum quinque annorum pro taillia et nomine taillie in festo Beati Remigii dicto abbati uel illi qui pro tempore fuerit abbas uel eius seruienti apud Aqueductum uiginti solidos Parisiensium necnon decimas terragia corueyas tam iornalium quam messium saluamentum auene et cetera seruicia consueta prout ceteri homines habitantes et residantes in predicta uilla de Aqueductus soluerunt et soluere consueuerunt ecclesie memorate Has autem pactiones ego Hugo maritus dicte Meline ratas habens et pro gratia suscipiens laudo uolo et approbo et de consensu meo confiteor esse factas Quare promittimus nos coniuges predicti per iuramenta nostra super sancta Dei euangelia corporaliter prestita et sub obligatione omnium bonorum nostrorum predictam tailliam et alia seruicia prout superius sunt diuisa reddere soluere prout superius est expressum Si uero in predictis uel aliquo predictorum deficeremus quod absit uolumus quod dictus abbas ad predicta bona recurrat et suam de eis tanquam de sibi commissis faciat uoluntatem et elapso quinquenio nisi nos aut liberi predicti ad predictum locum redire uellemus et ibidem residere et predicte ecclesie deseruire sine reclamatione alterius dominii prout ceteri homines dicte uille Uolumus quod dictus abbas ad predicta tanquam sibi commissa teneat et possideat et suam uoluntatem faciat absque reclamatione aliqua a nobis ex tunc super hoc facienda Uolentes nos compelli ad premissa tenenda quasi ex re adiudicata per curiam domini ducis Burgundie cuius iuridictioni quo ad hoc nos et nostros heredes supponimus In cuius rei testimonium litteris istis sigillum curie dicte supplicauimus apponi Actum in presencia Iohannis Robeleti notarii Salionis