Charter Document - 05320011
| Charter Number: | 05320011 |
|---|---|
| Cartulary Title: | Chartes de l'Abbaye de Saint-Etienne de Dijon. Chartes des années 1300-1309. |
| Charter Language: | Latin |
| Charter Origin: | Religious |
| Charter Type(s): | Assignment |
| Date: | 1300 - 1301 |
| Date type: | Internal, A.D., Feast |
| Resource Link(s): |
|
Charter:
Uniuersis presentes litteras inspecturis nos frater Hugo abbas monasterii Sancti Stephani Diuionensis ordinis Sancti Augustini Lingonensis dyocesis notum facimus quod cum uiri uenerabiles et discreti magister Lambertus quondam archidiaconus Laticenis in ecclesia Lingonensi magister Thomas de Thononio quondam physicus uir dominus Hugo Fautrelli curatus de Selongeyo fidelyssimus uir et nobilis domina domina Margareta uxor quondam nobilissimi uiri domini Johannis de Uergeyo senescalli Burgundie animarum suarum saluti cupientes prouidere dederint et legauerint conuentui uestro ad emendum redditus in augmentum pictancie prouentus quibus ipsorum pro anniuersario suo in ecclesia nostra annis singulis faciendo uidelicet predictus archidiaconus quadraginta libras Turonensium magister Thomas uigenti libras Turonensium Dominus Hugo Fautrelli centum libras Turonensium hoc a die certa quadam die sui obitus unum anniuersarium et aliud tercia die post festum Assumptionis Beate Marie Uirginis pro ipso in nostra ecclesia predicta annis singulis celebrantur ac predicta domina centum libras Turonensium et reges et principes modo impediant et contra dicant ne nos uel cetere persone ecclesiastice aliquid perpetuo acquitantur Nos tantarum personarum devotioni uolentes occurere ne tam piis desideriis deffraudentur confitemur predictas pecuniarum summas a predictis legatoriis uel eorum executoribus recepisse et habuisse de consensu et uoluntate conuentus nostri predicti conuersas seu conuertandas per nos abbatem predictum in usus utiles et necessarios monasterii nostri predicti maxime in deffensione cause nostre quam habuimus in Romana curia contra illos de capella ducis Burgundie de Dyuione pro quibus summis pecuniarum predictis et anniuersariis ut promittitur celebrandis assidemus et assignamus in perpetuum pro nobis et nostris successoribus pro dicto conuentui nostro in augmentationem pictancie sue fructus exitus et prouentus patronatus nostre ecclesie de Arcu super Tyliam ac decimas de Breceyo percipiendos et habendos in perpetuum annis singulis a predicto conuentui sine difficultate aliqua et quicquid iuris in dicta ecclesia ratione iuris patronatus ac in decimis dicte uille de Breceyo qualicumque ratione habuimus habere possumus et debemus presentatione tamen iurati quocienscumque dictam ecclesiam uacare contigerit nobis et nostris successoribus reseruata Et nos conuentus predictus receptionem pecuniarum predictarum per predictum abbatem nostrum assessionemque et assignationem predicti patronatus et decimarum nobis factas pro predictis anniuersariis ut promittitur faciendis ratas et gratas habentes promittimus et tenemur bona fide et sub uoto religionis pro nobis et nostris successoribus predicta anniuersaria annis singulis pro predictis legatoriis pro ut superius ordinatum est pro quolibet celebrare sollempniter et deuote Nosque abbas predictus assessionem et assignationem patronatus et decimarum predictarum tenere promittimus bona fide pro nobis et successoribus nostris et inuiolabiliter obseruare uolentes et expresse consencientes nos conuentus predictus quod de predictis pecuniarum summis de consensu et uoluntate nostra sit receptis predictus abbas noster gaudeat et eas commutat in usus utiles et necessarios monasterii nostri et specialiter cause nostre predicte prout sibi uisum fuerit expedire Nos uero abbas predictus uolumus et expresse consentimus pro nobis et nostris successoribus quod conuentus noster predictus habeat recipiat et in perpetuum sine difficultate percipiat fructus prouentus et exitus patronatus et decimarum predictorum prout superius est expressum In quorum omnium testimonium nos abbas et conuentus predicti sigilla nostra presentibus litteris duximus apponenda Actum in capitulo nostro die Ueneris post Octabas Purificationis Beate Marie Uirginis anno Domini millesimo trecentesimo mense februarii