Charter Document - 05320006

Ge Henriz de Uergey chantres de Besancon fais sauoir a touz cels qui uerront ces presentes lettres que come religious home labbes et le couuenz de Saint Estienne de Dyion de especiaul grace maient done et octroie un lor estan assis en une lor uile qui est appellee Uoirfontaines de lez Autrey a tenir a ma uie et faire mon profit et les fruz miens Ge uuel et promet en bonne foi que li diz estanz ne se pertirai de ma main ou de la lour a mon uiuant et après mon decès il repairerai es diz religious au point quil iert quant ge irai de uie a mort ansamble totes les croisances et amandances que ge haurai faites ou dit estan a nostre uiuant et touz les poissons qui serient troue dedanz frainchemant et seuz nul reclam seuz nule riens demander por moi ne por les miens ou requerir en la dite chose por quelque achoison que ceu soit et lou dit estans tenir en auxi bon point ou en mellour ou ge le reciurai de lour et se il auient par consoil d'ouuriers que ge face la chaucie qui or est au dit estan depecier et reédifier autre part plus bas ou tout lou cours de laiges dou ruissel qui passe par le dit estanz ou quelque lou que ce soit iai par ce ne demorrai que le diz estanz ne demoroit es diz religious auxi comme il est dessus deuise Et se il auient quam facont la chaucie autre part que li diz estanz occupait point d'autrui terre que de cele es diz religious ge suis tenuz et promet a bone foy baillier beaul escheange et faire le gre dou mien a cels cui la terre occupee seroi en tel maniere que le diz etanz ansamble touz edifices de molins ou autres profiz reuiengnent paisiblement es diz religious si come il est dessus dit Ces choses dessus dites promet ge garder tenir et maintenir a bone foi et par mon sairment si comme il est dessus deuise Ou tesmoignage des quex choses ge hai mis mon seul en ces presentes lettres et por plus grant seurte ge hai prie et requis a mon ame frere et seignour mon seignour Iehan de Uergey seneschaut de Borgoingne que ces conuenances si comme elles sont dessus deuisees uuelle tenir et garder et promettre a tenir et faire tenir por lui et pour ses hoirs es diz religious paisiblement seuz nul reclam Et ge Iehan de Uergey seneschauz de Bourgoingne a la prière et a la requeste de mon ame frere Henri de Uergey chantre de Besancon ces choses dessus dites uuel octroi et promet garder et tenir a bone foi et porter garantie es diz religious et a lour yglise et en obligois moi et mes hoirs de faire laissier en paiz le dit estan es diz religious ansamble totes les croissances et amendances qui seront faites au temps mon frère dessus dit seuz nul reclam et seuz nul ampaichemant metre de moi ne de mes hoirs apres le decès de mon dit frere En tesmoignage des quex choses ge hai mis mon seal en ces presentes lettres auec le seal de mon ame frere dessus dit en confirmation de uerite Ce est fait et done lan de grace mil trois cenz au mois de maiz