Charter Document - 05310053
| Charter Number: | 05310053 |
|---|---|
| Cartulary Title: | Chartes de l'Abbaye de Saint-Etienne de Dijon. 11, de 1291 à 1300. |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1296 |
| Date type: | Internal, A.D., Feast |
| Resource Link(s): |
|
Charter:
Uniuersis presentes litteras inspecturis officialis Lingonensis salutem in Domino Noueritis quod in nostra presentia propter hoc personaliter constitutus Ioannes de Saluia ciuis Lingonensis recognouit et confessus est coram nobis se dedisse et concessisse in puram et perpetuam elemosinam religiosis uiris abbati et conuentui Sancti Stephani Diuionensis uiginti solidos Uiennenses censuales pro remedio anime Guidonis quondam filii ipsius Ioannis et antecessorum suorum et pro anniuersario ipsius Guidonis singulis annis apud Diuionem in ecclesia Sancti Stephani a dictis religiosis faciendo quos uiginti solidos dictus Ioannes emit et habuit a Guillermo dicto lou Glou de Diuione carnifice et quos uiginti solidos Uiennenses censuales dictus Guillermus assedit et assignauit dicto Ioanni ut dicitur super quamdam domum ipsius Guillermi sitam Diuione in burco iuxta domum Gillete relicte Roberti filii Barriseti dicti Debarra ex una parte et domum Guillerme relicte Roberti dicti de Castellione quondam ex altera quos uiginti solidos ille qui possidet uel qui possidebit in posterum dictam domum tenetur soluere ut dicitur dictis religiosis singulis annis mense octobri et de predictis uiginti solidis et de omni iure proprietatis et possessionis quas dictus Ioannes habebat et habere poterat in dictis uiginti solidis et assignatione dicte domus et dictus Ioannes coram nobis deuestiuit et dictos religiosos per presentes litteras inuestiuit et omne ius et omnem actionem quod et quam habebat idem Ioannes in dictis uiginti solidis in assignatione dicte domus et contra possessores dicte domus dictis religiosis cessit coram nobis promittens dictus Ioannes per fidem suam in manu nostra corporaliter prestitam et dictam donationem et concessionem ratam et firmam in perpetuum habere et inviolabiliter obseruare nec in aliquo de cetero contra uenire per se siue per alium tacite uel expresse In cuius rei testimonium ad requisitionem predicti Ioannis presentibus litteris sigillum curie Lingonensis duximus apponendum Datum et actum die lune post festum apostolorum Petri et Pauli anno Domini millesimo ducentesimo nonagesimo sexto