Charter Document - 05310052
| Charter Number: | 05310052 |
|---|---|
| Cartulary Title: | Chartes de l'Abbaye de Saint-Etienne de Dijon. 11, de 1291 à 1300. |
| Charter Language: | Latin |
| Charter Origin: | Religious |
| Charter Type(s): | Sale |
| Date: | 1296 |
| Date type: | Internal, A.D. |
| Resource Link(s): |
|
Charter:
In nomine Domini amen Anno Incarnationis eiusdem millesimo ducentesimo nonagesimo sexto mense iunii Nos Osaneta et Adelineta sorores filie Regine de Aqueductu notum facimus uniuersis presentes litteras inspecturis quod nos sponte prouide laude et assensu Odeti mariti mei predicte Osanete et Ioannis mariti mei predicte Adelinete fecimus excambium perpetuum seu permutationem cum uiris religiosis abbate et conuentu Sancti Stephani Diuionensis in hunc modum quod pro eo quod dicti religiosi nobis tradunt et quittam perpetuo quamdam petie uinee sitam in finagio Aqueductus in Combehuron iuxta uineam Hugonis Thibaut et uineam Hugonis de Ventoux de qua tenemus nos pro pagatis in excambium et permutationem dicte petie uinee tradimus concedimus in perpetuum et quittamus pro nobis et nostris heredibus predictis religiosis pro ipsis et eorum successoribus quamdam domum cum fundo manso iuribus et pertinentiis eiusdem sitam apud Aqueductum iuxta domum Ioannete uiri dicti Larrot et iuxta domum Bone uiri Uiardi textoris quare de dicta domo deuestimus nos et heredes nostros et dictos religiosos et eorum successores inuestimus corporaliter de eadem et tenemur ex pacto et promittimus pro nobis et nostris heredibus per iuramenta nostra super Sancta Dei Euangelia corporaliter prestita et sub obligatione omnium bonorum nostrorum presentium et futurorum predictam domum predictis religiosis et eorum successoribus contra omnes perpetuo et firmiter garantire defendere et in pace tenere nostris propriis sumptibus et in nullo contraire de cetero tacite uel aperte et est sciendum quod si nos decederimus sine herede seu heredibus nostrorum propriorum corporum procreatis predicta petia uinee ad predictos religiosos et eorum successores perpetuo reuertetur illa uero que ex nobis superuixit predictam uineam pro se et suis heredibus sui proprii corporis procreatis tenebit et possidebit si uero sine herede seu heredibus sui corporis decesserit dicta uinea ad dictos religiosos pacifice reuertetur hoc saluo quod ipsi tenerentur dare et soluere Odeto et Ioanni maritis nostris predictis decem libras Uiennenses antequam in dicta uinea possimus aliquod reclamare et hec omnia et singula supra scripta nos Odetus et Ioannes predicti uolumus et penitus approbamus et de uoluntate nostra confitemur esse facta et insuper nos predicte sorores et ipsi mariti renuntiamus in hoc facto omnibus exceptionibus totius iuris et facti que contra predicta possent obiici seu dici et uolumus nos compelli ad premissorum obseruantiam quasi ex re adiudicata per curiam domini ducis Burgundie cuius iuridictioni quo ad hoc supponimus nos et heredes nostros in quorum testimonium litteris istis sigillum dicte curie rogauimus apponi actum in presentia Hugonis de Cabilone notarii Diuionis domini Adulphi de Sancto Lupo et domini Ioannis Teste presbiterorum testium ad hoc uocatorum Anno et mense predictis