Charter Document - 05310015
| Charter Number: | 05310015 |
|---|---|
| Cartulary Title: | Chartes de l'Abbaye de Saint-Etienne de Dijon. 11, de 1291 à 1300. |
| Charter Language: | Latin |
| Charter Origin: | Lay |
| Charter Type(s): | Purchase |
| Date: | 1292 |
| Date type: | Internal, A.D. |
| Resource Link(s): |
|
Charter:
In domine Domini amen Anno Incarnationis eiusdem millesimo ducentesimo nonagesimo secundo mense decembri ego Melineta uxor Bartholemeti Cheurot de Cutigneio notum facio uniuersis presentes litteras inspecturis quod ego sponte prouide considerata utilitate mea et commodo euidenti laude et assensu predicti mariti mei uendo concedo et in perpetuum quitto pro me et meis uiris religiosis abbati et conuentui Sancti Stephani Diuionensis pro se et eorum successoribus duas petias terrarum sitas in finagiis de Cutigneio et de Cheuigneo una ubi dicitur en Champson iuxta nemus de Ioceal et terram dictorum religiosorum et alia ibidem iuxta terram Andre Losici de Cheuigneo et terram dictorum religiosorum pretio trigenta librarum Uiennensium mihi a dictis religiosis in pecunia numerata solutarum de quibus teneo me plenarie pro pagata quare de duabus predictis petiis terrarum deuestio me et heredes meos et dictos religiosos et eorum successores investio corporaliter de eisdem hanc autem uenditionem ego prefatus Bartholemetus uolo laudo et approbo et hiis omnibus predictis meum assensum prebui et consensum et insuper nos predicti coniuges tenemur ex parte et promittimus pro nobis et nostris heredibus per iuramentum nostrum et sub obligatione omnium bonorum dictas terras liberas pro recta decima dictis religiosis et suis successoribus contra omnes perpetuo et firmiter garantire nostris sumptibus propriis et expensis et facere et prestare quidquid in causa euictionis debet fieri et prestari Renuntiantes insuper in hoc facto exceptionibus doli et in factum non numerate et non habite pecunie deceptionis in aliquo omni iuri in fauorem mulierum introducto et omnibus que contra tenorem presentium possem obiici seu dici et ad predicta tenenda uolumus nos compelli et ad premissorum obseruantiam tanquam ex se adiudicata per curiam domini ducis Burgundie cuius iuridictioni quo ad hoc supponimus nos et nostros heredes In quorum testimonium litteris istis sigillum dicte curie rogauimus apponi Actum in presentia Hugonis de Cabilone notarii Diuionis Hugoneti Letalenet et Briconis de Arbusio testium ad hoc uocatorum Anno et mense predictis