Charter Document - 05300018

On nom de nostre Seingnor Jhesucrist en lan de l'incarnation de celui meismes mil deux cents quatreuinz et un ou mois de mai Je Johanz fiz jaidis Perrenot dit le Chatelin de Thart et nos Margarite Jahannote et Bietriz serous dou dit Johan et filles jaidis dou dit Perrenot facons sauoir a toz ces qui uerront et orrons ces presentes lettres que nos auons uendu otroie et quitte en heritaige permenable par le lox et par le consentement de Henri de Aisere mari de moi Jahannote et de Petit Jahan de Troens mari de moi Bietriz a mon seingnor Jahan de Thart cheualier le leu et le siege dou molin de Nouot et le champ desus et le uerger desoz et le biez dou molin et totes les apartenances desus et desoz et de encoste et tot quanque nos i auons poons auoir et deuons de droit et de raison par la quarte partie dun gete laquelle quarte partie nos dauiens chascun un au dit seingnor de Thart par nos et par les hoires au preuoist Force et par les hoires Boicher et par les hoires Bet les auz de Thart douquel gete le diz sires de Thart ai quitte de tot en tot nos et nos hoires et les hoires au preuoist Force et les hoires Boicher et les hoires Bet les auz et nos nos en tenons par paiez et par ce de totes les choses uendues desus dites nos nos deuestons et de tot en tot et en reuestons le dit seingnor de Thart par sa uolunte faire en totes manieres et prometons par nos sairemenz corporalement done sus sainz euangeles chascuns pour le tot garantir a toz jorz mais a nos propres despens au dit seingnor de Thart et a ses hoires totes les choses uendues desus dites se aucun chalongor apparissoient que jai ne soit Prometons et sumes tenu nos Johanz Margarite Jahannote Bietriz Henricus et Jahanz Petiz desus dit par noz sairemenz que nos ne irons jaimais enconstre ceste uendue ne enconsces presentes lettres en parole ne en fait ne en consentement par nos ne par autres et uolunz que nos soions controint a totes les choses desus dites garder et tenir fermement a toz jors mais ausi comme de chose adjugie par la cort mon seingnor le duc de Borgoingne a la juridicion de la quelle nos submetons quant a ce nos et nos hoires et toz nos biens en tesmoingnaige de la quelle chose nos auons suppliez et fait metre en ces presentes lettres le seal de la dite cort ce fut fait en la presence de Lambert notaire de celi cort a Seint Johanz de les Loone et de mon seingnor Richart cure de Arconce et de mon seingnor Guion de Thart et de mon seingnor Humbert de Troens cheualiers tesmoings especialement a ce apelez en lan et on mois deuant diz