Charter Document - 05290077

En nom de Nostre Seigneur amen Ge Alixandres de Montagny sires de Sombernon et de Maalin damoiseaulx fais savoir a tous ceus qui uerront et ouront ces presentes lettres que comme descorde fut entre moy d'une part et religieuses dames Perrenon abbaausse suer Marie de Uerrey priouse suer Jehanne de Dijon secretainne suer Poince de Chaudenay celerere et tout le couuent de Praalon dou diocese de Lengres d'autre part sur ceu que je lour demandoie la garde pour lour abbaye de Praalon et de lour uille de Courcelles et lour maison roige et pour toute lour terre que elles hont en la chastellenie de Sombernon et de Maalain et sur plusours autres demandes que je lour façoie a la parfin pour lou consoil de prodomes pour moy et pour elles ceste descorde est accordé que je et mi hoir haurons la garde et la grant justice en lour uille de Courcelles et ou terrier de lad abbaye et de la uille qui est dessus qui est appellée les Bordes Et est ancoir ainsin acordey entre moy et les dictes dames et tout lou couuent de Praalon que dedans lour abbaye dois leu ruy qui court au trauers de l'abbaye pour deuers le mostier et pour deuers les dames ge Alixandres dessus diz n'auray nulle justice en nulle gens ne my hoir auxi se ensint n'estoit que aucuns dou siegle y feist forfait pour quoy il conuenist grant justice D'autre part dou ruy par deuers Maimmont dedans la cloison de l'abbaye ge et my hoir n'aurons point de justice en rendu ne en rendue ne en maicenier ne en maicenere ne es hommes de l'abbaye de forfait que il façoint fors la coignoissance que ge hauray et l'abbausse aura l'amande et de toutes autres genz dou siegle soit de mes hommes ou d'autres ge [et] my hoir haurons la justice grant et petite et l'amande deffors les murs de la dicte abbaye et dedans jusques au ruy et en la uille des Bordes et pour lou terreour de la dicte abbaye je Alixandres et my hoir hauront la justice grant et petite suz les renduz de la dicte abbaye ou je et my hoir n'auront point de justice dedans ne deffors Des amesses dedanz l'abbaye y est ensint ordené que quant il et lour hoirs deffaudront elles n'y puent autres amaser se n'est pour moy ou pour mes hoirs Des conques elles et lour deuanteres hont heuz faiz es fiez et es rerefiez en la terre de moy Alixandres dessus diz et de mes hoirs y est ensint acourdez que tuit ciz conques qui sont faiz dois le temps trespasses jusques a la confection de ces lectres et de quoy elles sont en saisine lour demourent et demorront a tous jours franchement et quittement et je par moy et par mes hoirs lour hay outroyé conformé et quictey et lour hay acquittey a tous jours toutes les raisons que je y hay et puys auoir et doy Et promet pour mon sairement doné corporelment surs sains euuangiles par moy et par mes hoirs les dictes dames et lour biens et lour chouses garder bien et leaumant comme bons gardiens et que contre ces conuenances tenir et garder fermement a tous jours je ne uiendra ne ne fera uenir pour moy ne pour autre et a ceu tenir et garder ge enloy moy et mes hoirs et uuil que ie soye contrains a garder ces conuenances auxi comme de chouse adiugié par la court de l'officiaul de Laingres et pour la court lou duc de Bourgne es juridicions des quelx quant ad ce je Alixandres dessuis diz met moy et mes hers Ou tesmoignage de la quel chouse je hay supplié et requis a mettre en ces lettres lou seaul de la court de Laingres et lou seaul de la court lou duc de Bourgne Ce est fait en la presence Bonot notaire de Dijon et de mons Hugues de Turcey et de mons Jehan de Chaigney cheualiers et de Jehan de Chaudenay damoiseaul tesmoins à ceu appellez en l'an de grace mil CCLXXV ou mois de mars Huetus Oillearum Ita est