Charter Document - 05290073

Nos Johans sire de Thart chevalier facons scauoir à tos ces qui uerront et orront ces presentes lectres que comme nos ahussiens fait à faire cas en arrières un molin desoz le molin Lambelot de Genley et a ses hoirs que l'on dit le molin de Tortenos nos reconoissons et disons certainement que nos pour droit ne pour raison ne poiens ne deuiens faire le dit moulin pour ce qu'il estoit nuisaubles au dit molin de Tortenos et pour ce nostre conscience nos ay repris en ce faict et auons faict à cheoir et à abattre ledit molin que nos auiens fait à faire desoz ledit molin de Tortenos et auons promis et sume tenu par nostre sairement corporalment doné sus sainctes euangiles que nos dois or en auant ne ferons molin ne es chose dois le molin de Tortenos deuant dit jusque au pont dou Gors de Thart ne ferons faire ne laisserons faire que soient nuisants as anfans ne as hoirs au dit Labelot de Genley pour la raison de lor moulin de Tortenos deuant dit est auons promis ausiment pour nostre sairement que nos dois or en auant ne irons encontre ces conuenances ne encontre ces présentes lettres et à ces choses deuant dictes à tenir fermement nos obligeons nos et nos hoirs et tos nos biens en quelque leu quil soient Et pour ce que ceste chose soit ferme et estauble à tos jors mais nos auons mis nostre seal en ces présentes lettres que fuirent faites en lan de grâce que corroit pour mil deux cens soixante et quinze au mois de nouembre