Charter Document - 05290070

Nous Pierres diz Paine d'Ahuit et Isabeaus sa femmes sauoir à touz que comme messire l'abbes et li couanz de Saint Estienne de Dyion nostre ame seignour de loi pure grace nous aient soffert à tenir dois Dyion les choses que nous tenons à Ahuit et les heritaiges que nous tenons en la uile et es finaige d'Ahuit lesquelles choses nous cognoissons estre de la seignorie et de la iuridiction es diz abbé et couuent nous cognussons et affermons par nos sarremanz corporelmant donez sur sainz eluangiles que quant quonque plaira es diz abbe et au couant ou alor comendemant nos repairerons nos et nostre hoir et somes tenu de repairier au leu cest a sauoir a Ahuit pour deseruir des choses que nous tenons et auons au leu auxi comme li autre homme d'Ahuit sont tenu de desseruir de lor biens que il ont audit leu se ce non l'abbes et li couanz porront recourre à toz les biens mobles et héritaiges que nous ariens Ahuit et ou finaige iusque tant que nous retornessiens au dit leu pour desseruir auxi comme li autre home doudit leu et à ce tenir et garder nous enloions nos hoirs En tesmoignage de la quelle chose nous auons sophié et requis a mettre en ces leitres les seaus a honorables homes Anseri archidiacre de Digenois en leglise de Langres et de maistre Guy deien de la Crestienté de Dyion et nos larcediacres et li deeins dessus dit es prieres et a la requeste des diz Pierre et Ysebaul auons mis nos seauls en ces leitres en tesmoignage de uérité Ce est fait en lan de grace mil cc et sexante quinze ou mois de deloir