Charter Document - 05290054
| Charter Number: | 05290054 |
|---|---|
| Cartulary Title: | Les Foires de Chalon-sur-Saône, des origines au XVIe siècle, et Chartes de l'abbaye de Saint-Etienne de Dijon de 1270-1276. |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1274 |
| Date type: | Internal, A.D. |
| Resource Link(s): |
|
Charter:
In nomine Domini amen Anno Incarnationis eiusdem millesimo ducentesimo septuagesimo quarto mense octobri ego Hugo de Blaseyo miles notum facio omnibus presentes litteras inspecturis quod Guido frater meus defunctus quondam canonicus Uergensis in ultima uoluntate sua bene compos mentis sue dedit et concessit in puram perpetuam elemosinam Deo et monasterio Sancti Stephani Dyuionensis in cuius monasterio traditus est ecclesiastice sepulture et uiris religiosis abbati et conuentui ibidem Deo seruientibus duas eminas bladi frumenti et auene per medium de annuo et perpetuo redditu quas assedit eisdem abbati et conuentui et monasterio Sancti Stephani predicti percipiendas et habendas et eisdem abbati et conuentui reddendas aut eorum mandato singulis annis in perpetuum infra festum Natiuitatis Domini in parte sua decimarum uille et territoriorum de Noiront et ad hoc ipsam partem suam dictarum decimarum et eam tenentes pro tempore in perpetuum obligauit Hanc autem elemosinam ego supradictus Hugo laudo uolo et concedo et tenere promitto firmiter in perpetuum et si quod absit ipsi abbas et conuentus uel successores eorum impedirent ratione feodi et occasione qualibet alia quominus dicti bladi perciperent et haberent termino et modo premissis ad solutionem eorum faciendam annuatim perpetuo infra festum predictum Natiuitatis Domini eisdem uel eorum mandato de frumento et auena ualentibus frumentum et auenam dictarum decimarum me et meos heredes et bona mea omnia presentia et futura obligo abbati et conuentui supradictis Et uolo me et meos heredes ac successores ad predicta tenenda compelli sicuti ex re adiudicata per curiam ducis Burgundie cuius iuridictioni quo ad hoc me et meos heredes et successores suppono In cuius rei testimonium litteris istis sigillum dicte curie supplicaui apponi Actum anno et mense predictis