Charter Document - 05290044

Je Jean sire de Trichasteaul marechaus de Bourgongne faict asçauoir à tous ces qui uerront et oiront ces présentes lettres que en ma présence par ceste chose espécialement estaubli par deuant moy en propre personne Agnelot d'Is fille Perrot Uaudin ça en arrières femme Habelot Perrot d'Is et Henry fils de ladicte Agnelot ont recogneu de leurs espoine gré sans contraindre et sans efforcier que ils ont uendu pour lor prou et pour lor profit Deu et Nostre Dame de la maison Deu de l'hospital de Trichasteal et frères de la deuant dicte maison Deu trois liures de cire censaux a touior mais lesquels trois liures de cire ils ont assis sur deux pièces de terre qui sient au finagage d'Is en Ys entre Ys et Diénay au finage c'on dit au Til ce est asçauoir li pièce qui siet entre Perrenin Nis d'Asne d'une part et Aimonin lou Gruiet d'autre et part au deuant dit Perrenin Nys d'Asne li autre pièce de terre est assize au finage dict entre Is et Diénay au finage i on dit dessous le moulin de Uilecharle ce est ascauoir li pièce qui siet entre Perrenin Nis d'Asne d'une part et lou pasquier d'autre et contorne ladicte pièce de terre sus la pièce Simonot Filtai en arrières sire Guillaume d'Is lesquels deuant dictes trois liures de cire sont achetées et establies pour faire lou tourcis pour alumer chacun iour à la messe le corp de Notre Seignour et sont uandues les deuant dictes trois liures de cire au prix de quatre liures et dex solz de Uianois de la monoie courant à Trichatel a ycel taus et un quartaul de consaul desquex deuant dicts deniers et douquel bled li deuant dict Agnelot d'Is Hobelot ses maris et Henry fils de la dicte Agnelot se sont tenu por paies anteriment en deniers nombrés et en bled mesuré lesquels deuant trois liures de cire sont establies a paier à Trichatel en ladicte maison Deu deuant le moustier Nostre Dame sus l'auter lou iour de feste de Toussaincts en tel menière que s'il aduonoit chose que li deuant dicte Agnelot d'Is Habelos ses maris et Henry ou quiconque tanra des or en auant les deuant dictes doux pièces de terre ou soit por achat ou por droict heritage en quelque menière quil les tienent ne aportoient a Trichatel chaque an en la deuant dicte maison Deu sur l'auter Notre Dame au deuant dit terme les dessus dictes trois liures de cire anterinement contamment et franchement sans nul aduantage demander en la deuant dicte maison Deu ce est ascauoir ne mangier ne a boiure li maistre et li freres de la deuant dicte maison Deu peuent et doiuent torner en lour doimoine sans contredit d'autruy les deuant dictes deux pièces de terre sans nule autre rançon por faire et pour maintenir lou deuant dict torcis aussi com il est dessus diuisé en tel manière que sil aduenoit chose que li maistres de la deuant dicte maison Deu quiconque en en sera mestre des or en auant uoulait reçoire ou paure la deuant dicte cire pour despandre ou por mettre un autre usage que en faire le deuant dict torcis Je deuant dict sire de Trischatel et quiconque en sera sire à icel tans pouons et deuons contraindre le maistre de la deuant dicte maison Deu à faire le deuant dit torcy et a restablir pour la requeste des preuoires et des frères de la deuant dicte maison Deu En tesmoignage de laquelle chose ie deuant dict Jean sire de Trichatel marechoux de Bourgongne a la prière et a la requeste des deuant dicts Agnelos Hablot et Henry ai mis mon scaul a ces présentes lettres que furent faictes en l'an de l'Incarnation Nostre Seigneur mil deux cent soixante et treize au mois de féurier