Charter Document - 05290034

Je Marienoz qui fus fame Rober dit seriant d'Ausone cai en arriers fas sauoir a toz ces qui uerront et orront ces présentes lettres que je neant controinte neant deceué mas de ma propre uolunté et estant de bone memoire par le remede de mame et des ames a mes ancessors c'est asauoir de mon pere et de ma mere et de Hougerot mon frare ai doné quitté et outroié an pure aumogne et perdurable a Deu et a Nostre Dame et au prioré de Mirebel espécialement por lame Rober dit Seriant qui fu mes mariz ce que je hauoie ne pouoie hauoir ne deuoie es petites censes de Mirebel ce est asauoir la quarte partie de ce que je partoie au prior et la moitié de ce que je partoie es anfanz de ma seror et ma partie des petites tierces et des granz ce est asauoir la sexte partie qui me auenoit por raison de mon heritaige les quex censes sunt cibses à Mirebel et ou finaige cest asauoir sus mes sus maisons sus prez sus terres primerement sus le mes au Paiot quatre deniers sus la garange et sus le mes Galopin nuef deniers sus le mes desoz la leuee de l'estan huit deniers sus le mes Robin huit deniers sus le mes Colas et le mes Pitait huit deniers sus le mes Gorert six deniers sus le mes Restait trois deniers sus le mes Bonore dous deniers tournois sus le mes Rainmont trois deniers sus le mes Pot au Tenoille trois deniers sus le mes au Bergier un denier sus le mes Odot de Uaroos dous deniers tournois sus le mes Aurayuerdi dous deniers sus le mes Esteuenot de Lestau quarte deniers sus le mes au Uoillart dous deniers sus le mes Roulesos dous deniers sus le mes Quasse Miche six deniers sus le mes à la fille au Gerbet huit deniers sus le prez Braimant trois deniers sus le prez Furton et Perrot dous deniers sus le prez à la brun dou Régnant dous deniers sus la roture de Saint Cymont que li Tunduz tient six deniers sus le celerima la fame Perron au Vert dous deniers sus le mes au Tritaudet trois deniers sus le mes Vauterot au Chepuis trois deniers sus le mes Richun et le Perisot trois deniers tournois sus le mes Roge Barbe quarte deniers laquele aumogne je Marienoz desus dite ai promis et sus tenue tenir et garder et accomplir à la bone foi en tele menière que quicumques soit priors de Mirebel doit faire ou faire a faire le servise por mes ancessors et chanter por moi ausimant le lendemain de la Toz Saintz et por mon frare Hougerot le mercredi après Penthecoste ansuigant En tesmoigne de laquel chose par ce quele soit ferme créable et tenable je Marienoz desus nommée par ma prière et par ma requeste a fait saeler ces lettres de scaul de prodomes cest asauoir dou scaul maistre Hugue de Mirebel curié de Tané et dou scaul Huguenin de Mirebel curié de Saint Moris de Pontaillié et fu fait en l'an de grace mil dous cenz et sexante et troz ou mois de joni