Charter Document - 05290021

Omnibus presentes litteras inspecturis frater Girardus abbas humilis totusque conuentus monasterii Sancti Petri Besuensis salutem in Domino Noueritis quod nos unanimiter et concorditer retinemus et accipimus ad a modiationem perpetuam a uiris uenerabilibus et religiosis abbate et conuentu monasterii Sancti Stephani Diuionensis quicquid habent in terciis et decimis terrarum et uinearum sitarum in territoris de Lentilleio circa aquam uersus Autreyum pro quinque bichotis bladi frumenti et auene per medium boni et legalis et receptibilis quos nos et successores nostri debemus et tenemur reddere et deliberare singulis annis in perpetuum de cetero infra festum Natiuitatis Domini priori eorum de Autreyo qui pro tempore fuerit uel eius mandato in grangia nostra de Boans de bono et legali frumento et bona et legali auena reddituum nostrorum de Boans ad mensuram generaliter in loco predicto currentem et nisi dicti quinque bichoti dicti bladi infra dictam Natiuitatem Domini uel saltem infra quindenam sequentem dicto priori de Autreyo qui pro tempore fuerit uel eius mandato fuerint persoluti uolumus nos et nostros successore teneri dicto priori in crastino dicte quindene ad emendam decem solidorum bone et legalis monete usualis et omnia dampna et expensas missiones costamenta que et quas incurrerit sustinuerit et fecerit pro dicto blado recuperando dicto priori restituere teneremur preterea dictus prior per se uel per mandatum suum auctoritate sua propria et sine qualibet offensa nos in bonis nostris poterit gagiare quousque dictum bladum et emenda decem solidorum predicta cum dampnis et expensis missionibus et costamentis predictis dicto priori de Autreyo qui pro tempore fuerit plenarie et integre persoluantur Et sub prenotatis conuentionibus dicti abbas et conuentus tenentur bona fide et sub uoto religionis qua tenentur astricte pro se et eorum successoribus quos ad hoc obligant dictas tercias et decimas eorum terrarum et uinearum sitarum in loco predicto nobis et nostris successoribus contra omnes perpetuo garantire Nos autem abbas et conuentus Sancti Petri Besuensis predicti hec omnia et singula prout expressa sunt superius et diuisa tenemur et promittimus bona fide et sub uoto religionis qua tenemur astricte tenere obseruare et facere at adimplere et ad ea tenenda et facienda nostros successores imperpetuum obligamus Renuntiantes in hoc facto ex certa sciencia sub dicto uoto religionis exceptioni doli in factum exceptioni minoris ualoris omni consuetudini et statuto cuiuslibet patrie omni auxilio juris canonici et ciuilis et omnibus exceptionibus priuilegiis et juribus que contra presens instrumentum uel factum possent obici seu dici In cuius rei testimonium et munimen perpetuum litteris presentibus sigilla nostra apposuimus Actum anno Domini millesimo ducentesimo septuagesimo primo mense decembri