Charter Document - 05290017
| Charter Number: | 05290017 |
|---|---|
| Cartulary Title: | Les Foires de Chalon-sur-Saône, des origines au XVIe siècle, et Chartes de l'abbaye de Saint-Etienne de Dijon de 1270-1276. |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1271 |
| Date type: | Internal, A.D. |
| Resource Link(s): |
|
Charter:
Uniuersis presentes litteras inspecturis ego Aalidis quondam uxor domini Guidonis de Fossato militis defuncti notum facio quod ego prouida deliberatione diem extreme messionis operibus misericordie preuenire et anime mee quieti prouidere cupiens pro remedio anime mee et anime Guiotti fratris mei et animarum omnium antecessorum meorum do concedo et offero in puram et perpetuam elemosinam Deo et ecclesie Beati Stephani Diuionensis et uiris religiosis abbati et conuentui eiusdem ecclesie presentibus et futuris duas eminas bladi yuernagii et auene per medium ad mensuram de Ycio quas assedi predictis abbati et conuentui percipiendas et habendas et eis uel eorum mandato reddendas et deliberandas singulis annis perpetuo infra festum Natiuitatis Domini super totam partem meam decime de la Chaume territorii de Ycio et uolo et precipio auctoritate presentium ut quicumque dictam partem meam dicte decime tenebit pro tempore de cetero dictas duas eminas dicti bladi de meliori yuernagio et meliori auena eiusdem decime per medium ad mensuram de Ycio annuatim infra festum Natiuitatis Domini dictis abbati et conuentui uel eorum mandato absque mandato a me uel a meis heredibus uel aliquo alio alterius expectando reddat et reddere teneatur Et ad hoc ipsam partem meam totam predicte decime et meos heredes aut quoscumque alios ipsam partem decime tenentes pro tempore in perpetuum obligo In cuius rei testimonium et munimen perpetuum litteris presentibus sigilla uirorum uenerabilium domini Petri decani capelle ducis et magistri Alberici decani Christianitatis Diuionensis rogaui feci et obtinui apponi et ipsas litteras sigillatas tradidi abbati et conuentui ecclesie Sancti Stephani supradicte Actum et datum anno Domini millesimo ducentesimo septuagesimo primo mense augusto