Charter Document - 05290014

In nomine Domini amen Anno Incarnationis eiusdem millesimo ducentesimo septuagesimo mense martii ego Johannes filius defuncti Perrinini filii defuncti Haymonis dicti Pautaz de Curia Arnulphi notum facio omnibus presentes litteras inspecturis quod ego prouida deliberatione non in aliquo circonuentus pro utilitate et necessitate mea titulo pure perpetue legitime ac irreuocabilis uenditionis uendidi concessi et quittaui ac etiam uendo concedo atque quitto in hereditatem perpetuam Andree Tonnelario burgensi Diuionensi et Oudaenot uxori sue pro eis et eorum heredibus duas petias uinearum sitas in finagio de Aqueductu quarum una sita est in Costa Aqueductus iuxta uineam domini Bartholomei curati de Bera ex una parte et iuxta uineam Petri Pelliparii ex altera et alia sita est en Byische ultra Aqueductum iuxta uineam domini Andree de Aqueductu presbiteri et iuxta uineam Humbelotti dicti Loischot sororii Giliberti de Aqueductu et iuxta uineam Guarneri dicti decani et se ingerit supra clausum domini abbatis Sancti Stephani Dyuionensis de Byische pretio scilicet quinquaginta et trium librarum Uiennensium de quibus a dictis emptoribus plenam perfectam et integram solutionem recepi et habui in pecunia numerata propter quod de dictis duabus petiis uinearum ego me penitus deuestiens predictos emptores pro eis et eorum heredibus corporaliter inuestiui et in uerum dominium et possessionem corporalem induxi Et promitto et teneor sub expressa obligatione bonorum meorum omnium mobilium et immobilium presentium et futurorum ubicumque existentium et per sacramentum meum pro me et meis heredibus quos ad hoc obligo prestitum super sancta Dei euangelia corporale dictas duas petias uinearum liberas et quittas ab omni exactione et onere pro recta decima et pro duodecim denariis censualibus garantire dictis Andree et Oudaenot et eorum heredibus perpetuo contra omnes et me pro eis semper et ubique locorum et in omni curia contra personas omnes opponere propter hoc et respondere propriis sumptibus et in me litis onus suscipere quam cito et quotienscumque super hoc fuero requisitus absque diebus aliis exigendis et eos inde conseruare modis omnibus indempnes si qui calumniatores apparerent quod absit et facere et prestare quicquid in causa euictionis debet fieri et prestari et in nullo contraire de cetero per me uel per alium uerbo uel facto seu consensu aut iure seu consuetudine uel modo alio qualicumque Que omnia et singula supradicta ego Bonasoror uxor dicti Johannis sponte prouide sine ui et metu et sine circunuentione qualibet laudo et ratam ac firmam habeo et promitto imperpetuum habere iuramento prestito super sancta Dei euangelia corporali et in nullo contraire de cetero per me uel per alium ratione dotis uel donationis propter nuptias aut auerie uel modo alio qualicumque renuntiamus autem in hoc facto nos Johannes et Bonasoror predicti quilibet nostrum insolidum et pro toto ex certa scientia exceptioni non numerate et non recepte pecunie et exceptioni deceptionis ultra dimidiam iusti pretii exceptioni doli metus et in factum omni auxilio iuris canonici et ciuilis omnibus iuribus in fauorem mulierum introductis fori priuilegio ac omnibus exceptionibus defectionibus occasionibus rationibus iuribus et aliis que contra permissa possent obici seu dici ac etiam iuriducenti generalem renuntiationem non ualere uolentes quod omnia supradicta habeantur pro enumeratis specialiter et expressis In quorum omnium testimonium et munimen litteris istis sigilla uirorum uenerabilium domini Petri decani capelle ducis et magistri Alberici decani Chritianitatis Dyuionensis rogauimus fecimus et obtinuimus apponi Actum anno et mense predictis