Charter Document - 05290008
| Charter Number: | 05290008 |
|---|---|
| Cartulary Title: | Les Foires de Chalon-sur-Saône, des origines au XVIe siècle, et Chartes de l'abbaye de Saint-Etienne de Dijon de 1270-1276. |
| Charter Language: | Latin |
| Charter Origin: | Lay |
| Charter Type(s): | Concession |
| Date: | 1270 |
| Date type: | Internal, A.D. |
| Resource Link(s): |
|
Charter:
In nomine Domini amen Anno Incarnationis eiusdem millesimo ducentesimo septuagesimo mense Augusti ego Hugo dictus Graindorge de Diuione presbyter notum facio omnibus presentes litteras inspecturis quod ego prouida deliberatione in bona mentis dispositione licet infirmus corpore diem extreme messionis operibus misericordie preuenire et anime mee quieti et saluti prouidere cupiens pro remedio et salute anime mee et pro anniuersario meo in ecclesia Sancti Stephani Diuionensis singulis annis in perpetuum faciendo do concedo et offero Deo et ecclesie predicte Sancti Stephani et uiris religiosis abbati et conuentui eiusdem ecclesie et successoribus eorumdem quadraginta solidos monete Uiennensis de annuo et perpetuo reddittu quos assedi predictis abbati et conuentui percipiendos et habendos et eis uel eorum mandato reddendos in festo beati Bartholomei apostoli annuatim in perpetuum de cetero super domum meam que fuit Andree Bardot quam acquisiui titulo legitime emptionis quam Bartholomeo curato de Curia Arnulphi filio Petri Graindorge nepotis mei in hereditatem perpetuam contuli que domus predicta sita est Diuione in Castro ante abbatiam Sancti Stephani predicti et super fundum mansum iura et pertinentias dicte domus ita quod quicumque dictam domum cum fundo manso iuribus et pertinentiis eius tenebunt pro tempore de cetero dictos quadraginta solidos dicte monete dictis abbati et conuentui uel eorum mandato annuatim in festo beati Bartholomei apostoli de cetero reddant et reddere teneantur et nisi soluti fuerint annuatim in festo predicto uolo et instituo atque precipio ut ex tunc in antea dicti abbas et conuentus per se uel per mandatum eorum auctoritate propria et sine clamore et ostensione curie cuiuslibet ad dictam domum et ad fundum mansum iura et pertinentias eius recurrant et recurrere possint et debeant eamque teneant faciantque ex ea fructus modis omnibus suos quousque dicti quadraginta solidi Uiennenses pro quolibet anno quo soluti non fuerint integre persoluantur et ad hec omnia que premissa sunt tenenda perpetuo obligo dictis abbati et conuentui et successoribus eorum dictam domum cum fundo manso iuribus et pertinentiis eius et illos qui eam tenebunt pro tempore perpetuo successione In cuius rei memoriam et robur perpetuum presentibus litteris sigilla uirorum uenerabilium domini Petri decani capelle ducis et magistri Alberici decani Christianitatis Diuionis supplicaui feci et obtinui apponi in testimonium ueritatis Actum anno et mense predictis