Charter Document - 05290003

Nos Hugues dux de Borgoingne facons sauoir a touz cels qui uerront cels presentes lettres que en nostre presence establiz por ce specialment messires Guillaumes de Francois chevaliers recognut par devant nos que por lou remede de s'ame et des ames a ses deuanciers il ai donne et ottroie en pure et permaingnable aumosne a Deu et a l'iglise de Saint Estiene de Dyion et a religious prodomes l'abbe et lou couuent de Saint Estiene deuant dit et au curé de Francois sept liures de la monoie de Uiennois de la some de sept liures et dix solz de la dite monnoie lesquels li diz Guillaumes ai recogneu par deuant nos que i auoit et prenoit chascun au frainchement en franc aluef de rente parmaingnable en la cense et es tailles de Saint Aubin desquels sept liures et dix solz li deuant dit diz solz sont au luminaux de l'iglise de Francois de laumosne doudit Guillaumes et des sept liures de ceste presente aumosne li diz Guillaumes ai uoulu et ottroie par deuant nos que l'abbes et li couuent de Saint Estiene de Dyion aient et praingnent chascun au a touz iors mais la moitié et li curez de Francois l'autre moitié et uielt et ottroie par deuant nos que les dites sept liures de Uiennois sauz nul autre commendement dois or en auant attendre de lui ne de ses hoirs soient paies au commendement de l'abbe et dou couuent deuant diz et au cure de Francois si comme il est desus deuise chascun au touz ior mais Et ai cogneu par deuant nos li diz Guillaumes que li curez de Francois quoiqu'il soit par lou tens doit chanter ou faire chanter por lou remede de l'ame doudit Guillaumes et de ses deuanciers et de ses successors tous iorz mais chascune semaine trois messes en l'iglise de Francois ne uouloit deseruir les trois messes chascune semaine si comme il est desus dit il uielt et ottroie par deuant nos que l'abbes de Saint Estiene que serai abbes par lou tens faee deseruir les trois messes et praingne et ait entérinement por lui et por lou couuent de Saint Estiene les dites sept liures de Uiennois Et ai promis li diz Guillaumes par sai sairment fait par deuant nos que contre ceste aumosne il ne uenrai iamais par lui ne par autre et à la dite aumosne tenir il ai enloie ses hoirs Et que ceste chose soit ferme et estable à touz iorz par la prière doudit Guillaumes nos auons fait mettre nostre seal en cels presentes lettres Ce est fait en l'an de grâce MCC sexante et dix ou mois d'auril