Charter Document - 05281016
| Charter Number: | 05281016 |
|---|---|
| Cartulary Title: | Du vol et de sa répression en Bourgogne sous l'ancien droit et Chartes de l'abbaye de Saint-Etienne de Dijon, de 1260 à 1270. |
| Charter Language: | French |
| Charter Origin: | Religious |
| Charter Type(s): | Declaration |
| Date: | 1263 |
| Date type: | Assigned |
| Resource Link(s): |
|
Charter:
L'abbes de saint Estiene de Dyion entent a prouer que quant il se departi de cest pars il conta à sire Bertran Pelerin Et toutes choses contées il dut au dit Bertran trois cent et sexante libres de tornois Et furent aterminées à quatre anz a paier Cest a sauoir chascun an cent libres et la darnière année sexante libres Et li bailla les rantes de Dyion por sexante libres Et le remenant il dut panre ou tounel dou banc et se ce ne ualoit chascun an cent libres de tornois il le dut parfaire dou suen Et promist li diz Bertranz a faire letres de quitance de toutes dettes à l'église de saint Estiene et randre toutes letres quil auoit de leglise Et uolt que se on trouuoit aucunes letres des iqui en auant queles fussent nules Apres labbes entent a prouer que li diz Bertranz li presta sept cent libres et vingt cinq libres de tornois pour neuf cent libres de tornois a paier a neuf ans lesquels neuf cent libres labbes a paies et uolt sire Bertranz ou lit de la mort que on seust la uerite de ceste chose Apres labbes entent a prouer que il conta audit Bertran en lan nostre Seignor mil deux cent et sexante deux le juedi deuant lannontiation Nostre Dame et li dut l'abbes toutes choses contées cent et dix libres de tornois et cent sols de tornois por le chamberlanc de qui il auoit un henap en gaiges Cest a sauoir cinquante libres de paiement de cele année et sexante libres de lannée a auenir Et labbes li deuoit faire ualoir ces sexante libres de tornois Et ce meismes reconnut lidiz Bertranz ou lit de la mort Et li cent sols de tornois deuant dit par le chamberlanc furent paie et li henaps renduz