Charter Document - 05280059
| Charter Number: | 05280059 |
|---|---|
| Cartulary Title: | Du vol et de sa répression en Bourgogne sous l'ancien droit et Chartes de l'abbaye de Saint-Etienne de Dijon, de 1260 à 1270. |
| Charter Language: | Latin |
| Charter Origin: | Religious |
| Charter Type(s): | Decree |
| Date: | 1269 |
| Date type: | Internal, A.D., Feast |
| Resource Link(s): |
|
Charter:
Nos Sancti Benigni Diuionensis et nos Sancti Petri Besuensis abbates nos frater Jacobus prior Sancti Benigni Diuionensis nos Petrus dictus de Barro decanus capelle Ducis et magister Albericus decanus Christianitatis Diuionensis nos Robertus cantor predicte capelle et magister Theobaldus canonicus Lingonensis de Diuione notum facimus uniuersis presentes litteras inspecturis quod frater Henricus filius inclite recordationis quondam ducis Brabantie anno sue probationis in monasterio Sancti Stephani Diuionensis ordinis Sancti Augustini Lingonensis diocesis sicut ab ipso Henrico et a presentibus fide cognouimus elapso et amplius nobis in festo Beatorum Remigii et Germani in iam dicto monasterio Sancti Stephani presentibus uidentibus et audientibus fecit professionem solempnem secundum regulam Sancti Augustini in hec uerba Ego frater Henricus facio professionem et promitto stabilitatem et conuersionem morum meorum et obedientiam secundum regulam Sancti Augustini coram Deo et omnibus sanctis eius in hoc monasterio quod est constructum in honore sancti protomartiris Stephani in presentia domini Amidei abbatis predictam uero professionem manutenens scriptam et ore suo proprio perlectam obtulit super altare Sancti Stephani memorati Promisit etiam idem Henricus ibidem in presentia nostra uiro religioso fratri abbati eiusdem monasterii obedientiam usque ad mortem In cuius rei testimonium nos omnes predicti ad hec ibidem specialiter euocati presentibus litteris sigilla nostra duximus apponenda Et nos frater Amideus abbas memorati monasterii Sancti Stephani una cum sigillis omnium predictorum presentibus litteris sigillum nostrum apposuimus in testimonium predictorum Datum et actum in festo beatorum Remigii et Germani in capite octobris Anno Domini millesimo ducentesimo sexagesimo nono