Charter Document - 05280056

Je Symonius sires de La Marche et de Chaucins damoiseauls fais a sauoir a touz ces qui uerront ces presentes leitres que comme descors fut entre moy dune part et les religious barons labbes et le couant de Saint Estienne de Diion dautre part sor ce que le deuant diz abbes et li couenz disoient que il et li homme de Custigne auoient plain et parfait usaige de pasturer partouz les finaiges de Cheuigne ma uile iusque a la Tyle par domage rendant ie uoullanz oster le descort de moy et de labbes et du couant deuant diz sor ce enquis par proudomes la uerite de ces choses et trouoi par lanqueste que ie fis que dancien tans douquel temps il nest memoire auoient li deuanz diz abbez et li couanz et li homes de Custigne et li munier de Senecey et si hoir homes de Saint Estienne de Dyion usaiges de totes meneres de bestes que ils a Senecey et à Custigne ou fussient los propres ou les eussent a crois ou a moyson ou a prest por loz afaires es finaiges de Cheuigne en iusque a la Tyle cest asauoir des le molins aus deuant diz abbe et au couant que il ont selont Cheuigne iusquau bois de Senecey par defors les aies et des ce meismes molin par deca la riuere de Tyle uers Dyion iusquau molins de Lempri par touz les finaiges de Cheuigne por damaige rendant au regart de proudomes Pour la quel chose ie ne uoillanz faire tort es deuant diz abbe et couant ne es hommes de Custigne ne au munier de Senecey ne a ses hoirs hommes de Saint Estienne de Dyion uuil et otroy que li deuanz diz abbes et li couenz et li home de Custigne et lis muniers et si hoir home de Saint Estienne de Dyion por totes les bestes qui hui sont et qui seront aient des oir en auant en la menere dessus dite a Custigney et a Senecey par touz les finaiges sanz contredit de moy ne des miens et sans nul empoichemant faire plain et parfait et franc usaiges de pasturer à touz iourz mais toutes lor bestes quelqueles soient quil ont ou aueront en la menere dessus dite a Custigney et à Senecey par touz les finaiges de Cheuigne ensi comme il se porte de lonc et de large ensi comme il est dessus dit for les ayes de Cheuigne et la terre entre les ayes et la uile de Cheuigne Et uuil et otroy que il puissient mener les bestes deuant dites boiure a la riuere de Tyle por damaige randant des dessus a la uille de Cheuigne iusquau molin de Lempri totes les foiz que lor plaira Et est a sauoir que se ie uendoie tout entierement mon bois que lon apele Aloyres deca la Tyle ils se tenroient de pasturer ou dit bois des lou temps que il seroit touz copez iusqua XI anz touz ensuiguanz Et apres les diz XI anz ils porront et doiuent pasturer par lou dit bois d'Aloires ensi comme deuant Et est a sauoir que se beste sans garde ou perdue ou por lusure estoit trouee es ayes ou es terres qui sont entre la uile de Cheuigne et les hayers lon ne pourroit riens demander por la deuent dite beste Et toutes ces choses deuent dites et une chascune par soy ie promet tenir et garder por moy et por mes hoirs et touz iours mais sans mettre ban es diz pasturaiges et comment a mes sugetz de Cheuigne que il les deuent diz labbe et le couant et les hommes de Custigney et cels de Senecey ne lor ne les bestes dessus dites ne empoischoient ne destorboient es diz pasturaiges En tesmoing de laquele chose ie ai mis mon seaul en ces presentes lettres Ce fut fait en lan de grace MCCLXIX ou mois de juing