Charter Document - 05280053

In nomine Domini amen Anno incarnationis eiusdem MCC sexagesimo nono mense maii Ego Johannes Giberz de Roura ego Durandus li Bullez ego Johannes frater eius ego Uuillermus li Muge et ego Radulphus dictus Coquins frater eius notum facimus omnibus presentes litteras inspecturis quod nos prouida deliberatione non in aliquo circonuenti pro nostris utilitatibus uendidimus concessimus et quittauimus in hereditatem perpetuam magistro et fratribus Domus Dei de Broichons peciam unam circiter septem secturas continentem liberam ab omni seruitute et onere pro sexdecim denariis censualibus qui debentur domino de Thar sitam inter Uarrangias et Thar in prateria ubi dicitur en Espaillart iuxta ripariam Oscare et iuxta pratum Porebacent et iuxta pratum Hugonini Crespin iuxta pratum Paiget et Johannis fratris eius et a parte superiore iuxta pratum dictorum magistri et fratrum uidelicet precio quinquaginta librarum monete Uiennensis de quibus a dictis magistri et fratribus recepimus et habuimus pagamentum integrum in pecunia numerata Et propter hoc de dicta pecia prati nos omnino deuestiuimus et dictos magistrum et fratres corporaliter inuestiuimus et in possessionem corporalem induximus per manum domini Johannis tunc magistri Domus Dei predicte Et tenemur et promittimus sub expressa obligatione bonorum nostrorum omnium mobilium et immobilium presentium et futurorum ubicumque existentur et per sacramentum nostrum pro nobis et nostris heredibus quos ad hoc obligamus prestitum super sancta Dei euangelia corporale dictam peciam prati modo premisso liberam garantire dicti magistri et fratribus et eorum successoribus perpetuo contra omnes uidelicet ego Johannes Giberz medietatem tocius prati predictis et nos alii medietatem aliam prati predicti et nos pro eis semper et ubique locorum et in omni curia contra personas omnes opponere propter hoc et respondere propriis sumptibus et in nos pro eis litis onus suscipere quanto et quocienscumque super hoc uocati fuerimus sine diebus et indutiis exigendis et eos inde conseruare modis omnibus indempnes si qui calumpniatores apparerent quod absit et in nullo contraire de cetero per nos uel per alios uerbo uel facto seu consensu seu iure uel consuetudine uel modo alio qualicumque Renuntiamus autem quilibet in solidum in his omnibus et singulis per sacramentum nostrum prouide exceptioni precii predicti integre non habiti iusti et legittimi et exceptioni minoris precii et omni auxilio iuris canonici et ciuilis et consuetudinis et facti exceptioni doli mali lesionis et circonuentionis in aliquo et omnibus deffensionibus exceptionibus occasionibus et aliis quibuscumque que contra presens instrumentum uel factum possent obici seu dici Hec autem omnia et singula supradicta ego Adelina uxor dicti Johaunis Gibert nos Uiennetus Helyottus Uuillermus clericus et Johannes filii dictorum Johannis et Adeline ego Margaritta uxor Uuillermi lou Muge et nos Alaysoz et Henricus liberi dictorum Uuillermi et Margarrite ego Gelia uxor dicti Radulphi et ego Adelina filia Petri lou Muge fratris dictorum Uuillelmi et Radulphi sponte prouide sine ui et metu laudamus et rata et firma habemus et promittimus in perpetuum habere iuramento prestito super Dei euangelia corporali et in nullo contraire de cetero per nos uel per alios ratione dotis uel donationis propter nuptias uel conquestus aut minoris etatis uel auerie uel modo alio qualicumque renuntiantes in hoc facto per sacramentum predictum omni auxilio iuris canonici et ciuilis et consuetudinis et facti et omnibus iuribus in fauorem mulierum introductis etatis et patrie potestatis auxilio et omnibus que contra presens instrumentum uel factum possent obici seu dici In cuius rei testimonium et munimen nos omnes predicti litteris presentibus sigilla uirorum uenerabilium domini Petri decani capelle Ducis et magistri Alberici decani Christianitatis Dyuionensis supplicauimus et fecimus apponi Actum anno et mense predictis