Charter Document - 05280051
| Charter Number: | 05280051 |
|---|---|
| Cartulary Title: | Du vol et de sa répression en Bourgogne sous l'ancien droit et Chartes de l'abbaye de Saint-Etienne de Dijon, de 1260 à 1270. |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1268 - 1269 |
| Date type: | Internal, A.D. |
| Resource Link(s): |
|
Charter:
In nomine Domini amen Anno incarnationis eiusdem millesimo ducentesimo sexagesimo octauo mense martio Ego Renaudus filius defuncti Petri de Parriceio notum facio omnibus presentes litteras inspecturis quod cum Bona filia defuncti Radulphi Trousse pro remedio anime sue et anniuersario suo in ecclesia Beati Stephani Dyuionensis annuatim in perpetuum faciendo dedisset in puram et perpetuam elemosinam Deo et ecclesie predicte viginti solidos monete Dyuionensis de annuo et perpetuo redditu et eos assedisset percipiendos et habendos annuatim perpetuo predicte ecclesie et uiris uenerabilibus et religiosis abbati et conuentui ipsius ecclesie super domum suam et super mansum et pertinencias eius sitam Dyuione retro ecclesiam Beate Marie iuxta domum meam ex una parte et iuxta cameras domini Eurardi dicti Diuitis de Dyuione militis quas Guillermus de Burco clericus tenet ad uitam suam ex altera et dicta domus ad destructionem per ignis incendium deuenerit ego qui mansum quo dicta domus erat teneo nolens ipsam elemosinam obliuioni dari uel in aliquo deperire pro dictis uiginti solidis Dyuionensibus promitto et teneor reddere et soluere singulis annis in perpetuum de cetero in crastino Beate Marie Magdalenis dictis abbati et conuentui uel eorum mandato decem solidos monete Uiennensis quos eis assedi super predictum mansum dicte domus et super stallum meum et pertinencias eius situm Dyuione in foro ueteri in domo mercatorum iuxta stallum domini Johannis militis dicti Diuitis ita quod quicumque mansum et stallos predictos tenebit de cetero dictos decem solidos monete Uiennensis annuatim dictis abbati et conuentui uel eorum mandato reddet et reddere tenebitur termino supradicto et nisi predicto termino soluti fuerint uolo concedo et auctoritate presentium instituo ut extunc ipsi abbas et conuentus auctoritate propria et sine clamore et ostensione curie cuiuslibet per se uel per eorum mandatum ad dictos mansum et stallum et eorum pertinencias recurrant et recurrere possint et debeant eosque teneant ex his faciendo modis omnibus fructus suos quousque dicti decem solidi Uiennenses de quolibet anno quo soluti non fuerint integre persoluantur Et quamcito ego uel heredes mei in manso predicto domum competentem et ydoneam ad hoc fecerimus dictus stallus ab assignatione obligatione et onere dictorum decem solidorum Uiennensium liber erit penitus et immunis et dicti abbas et conuentus quocienscumque dicti decem solidi Uiennenses eis uel eorum mandato dicto termino soluti non fuerint ad ipsam domum et ad mansum et pertinencias eius per se uel per mandatum eorum auctoritate propria et sine clamore et ostensione curie recurrant et recurrere poterunt et ea omnia tenere facere ex his omnibus fructus modis omnibus suos quousque dicti decem solidi pro quolibet anno quo soluti non fuerint integre persoluantur In cuius rei testimonium et munimen litteris presentibus sigilla uirorum uenerabilium domini Petri decani capelle Ducis et magistri Alberici decani Christianitatis Diuionensis supplicaui et feci apponi Actum anno et mense predictis