Charter Document - 05280049

Nos Guiz Pitous priors de Trichasteaul et nos Haymmes maistres de la maison Deu d'Oruile et ie Poncez curiez de Trichasteaul facons sauoir a tous ces qui uerront ces letres que Jahanz li fiz Gelot lou Chambellant estaubliz en nostre presence ha recogneu par deuant nos que il ha uandu iusque a dis anz dans la Sen Reme pruchienemant uenant au maistre et es freres de la maison Deu de Trichasteaul une mine de conseaul quil auoit chascun an en la dite maison Deu causaument per lou mulin de la Tosche por sis libres de Vianois des quex sis libres de Vianois li diz Jahanz sest tenuz por bien paies por deuant nos Li diz Jahanz et Geloz li Chambellant ses peres desus nommes hont promis por lor sacremenz donez corporement porter leaul garantie de la dite uandue uers toute ianz au maistre et es freres de la dite maison et nen puent auler encontre ne faire auler autruy et tout droit oste quaidier lor porroit Et por que ceste chouse soit ferme et estaubles nos Guiz et nos Haymmes et ie Poncez desus dit a la priere et a la recoste dou dit Jahanz et de Gelot son pere desus dit auons mis nos seaus en ces presentes letres qui furent faites en la de grace MCCLXVIII ou mois de faurer lou uanredi deuant la Chandeleusse