Charter Document - 05280046

Je Jehanz sires de Trichatel faiz sauoir a toz ces qui uerront ces letres que je ai done et otroie en armoigne perpetuel a toz ior mais por lou remede de marme et de Marie ma famme et de mon pere et de ma mere et de mes ancessors a Deu et a Nostres Dame et as freres de la maison Deu de Trichastel lou molin qui est assis desoz Trichastel que on apele lou molin dame Amoingart et lor ai promis an bone foi par mon sairemant por moi et por mes hoirs que ie ne mi hoir ne poons acquerir molin an la reuiere de Trichastel tant com li finaiges dure ne faire molin a uant ou dit finaige de Trichastel se n'estoit per la uolante des diz freres et dou maitre de la dite maison Deu Et saus me estoit que ie ou mi hoir faciens auquun molin fuer doudit finaige de Trichastel ie ne mi hoir ne poons les hommes de Trichastel controindre quil iuoisent mourre Et auec cou ie ai done au maitre de ladite maison et a ces qui apres lou seront maitre de ladite maison qui puisse faire peschier an ma riuiere bannal de Trichastel a une trulle esposse a la meniere antel meniere que son pregnoit a la trulle poisson qui uailliet plus de trois deniers li poissons doit etre aportez a la cort amont au seignor ou a son commandemant Et est a sauoir que ie et mi hoir qui seront seignor de Trichastel pens faire bannes et descens et angins por pechier a nostre uolante ou biez de sus loudit molin Et se cou estoit chose que le priors de Trichastel ne li chanoine se plainessent de moi por anchief des bannes et des descens que ie ou ces qui seront sires de Trichastel auriens fait por anchief de lanpooichemant de lor molin qui est desoz lou priore li maitres de la dite mason Deu quiqueoncques an fust maistres man porteroit guarantie uers loudit prior et uers les chanoines Et sil ne man pooit porter guarantie ie ou ciel qui seroit sires de Trichastel repanriens les poissons ou dit molin que ie leur auois donez et an feroit li muniers sairement dou guarder por moi le poisson con i panroit et i retandrienz a nostre uolante Ceste aumoigne ai ie faite par lou loux et par lotroi de Guiot mon fil et de Jehan mon fil Et por cou que ceste chose soit ferme et estauble a toz iorz mais iai mis mon seal en ces letres faites en lan de grace mil et deux cens et soixante et uit au mois de iunot