Charter Document - 05280037

In nomine Domini amen Anno incarnationis eiusdem MCC sexagesimo sexto mense octobris nos Johannes et Hugoninus fratres filii domini Hugonis dicti Louput militis notum facimus omnibus presentes litteras inspecturis quod nos prouida deliberatione non in aliquo circonuenti pro utilitate et necessitate nostra uendidimus concessimus et quittauimus in hereditatem perpetuam uiris uenerabilibus abbati et conuentui Sancti Stephani Dyuionensis sextam partem sedis cuiusdam molendini et omnium iurium et pertinenciarum dicte sedis in aquis aquarum decursu fundo bisso bannis redditu bladi et in omnibus exitibus bonis et commodis quibuscumque que sedes sita est supra pratum dictorum abbatis et conuentus quod uocatur Espaillart et uocatur illa sedes molendinum de Tile uidelicet inter Varanges et Ianle De cuius uenditionis precio iusto et legittimo decem librarum Uiennensium recepimus omnino perfectum et integrum pagamentum in pecunia numerata et propter hoc de dicta sexta parte predicte sedis et omnium iurium et pertinenciarium eius nos omnino deuestiuimus et dictos abbatem et conuentum Sancti Stephani per manum domini Amidei tunc abbatis dicti locis corporaliter inuestiuimus et tenemur et promittimus quilibet in solidum et pro toto sub obligatione bonorum nostrorum omnium mobilium et immobilium presentium et futurorum et per sacramentum nostrum pro nobis et nostris heredibus quos ad hoc obligamus prestitum corporale dictam partem sedis et omnium iurium et pertinenciarum eius garantire dictis abbati et conuentui perpetuo contra omnes et nos pro eis semper et ubique locorum et in omni curia contra personas omnes opponere propter hoc et respondere propriis sumptibus et eos inde conseruare modis omnibus indempnes si qui calumpniatores apparerent quod absit et in nullo contraire de cetero per nos uel per alios uerbo uel facto seu consensu seu iure uel consuetudine uel modo alio qualicumque Hec autem omnia ego Clara uxor dicti Johannis et ego Regina uxor dicti Hugonini sponte prouide sine ui et metu laudamus et rata et firma habemus et promittimus in perpetuum habere iuramento prestito corporali et in nullo contraire de cetero per nos uel per alios ratione dotis uel donationis propter nuptias uel auerie uel modo alio qualicumque Renuntiamus autem nos omnes predicti in hoc facto exceptioni minoris precii et exceptioni precii iusti et legittimi non habiti et omni auxilio iuris et consuetudinis et facti et omnibus iuribus et gratiis in fauorem mulierum introductis et omnibus que contra presens instrumentum uel factum possent obici seu dici In cuius rei testimonium et munimen litteris illis sigilla uirorum uenerabilium domini Petri decani capelle Ducis et magistri Alberici decani Christianitatis Diuionensis rogauimus et fecimus apponi Actum anno et mense predictis