Charter Document - 05280034
| Charter Number: | 05280034 |
|---|---|
| Cartulary Title: | Du vol et de sa répression en Bourgogne sous l'ancien droit et Chartes de l'abbaye de Saint-Etienne de Dijon, de 1260 à 1270. |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1266 |
| Date type: | Internal, A.D. |
| Resource Link(s): |
|
Charter:
In nomine Domini Anno eiusdem millesimo ducentesimo sexagesimo sexto mense aprili ego Parisia filia quondam domini Haymonis de Argilleio militis defuncti notum facio omnibus presentes litteras inspecturis quod ego prouida deliberatione diem extreme messionis operibus misericordie preuenire et anime mei saluti prouidere do et concedo in puram et perpetuam elemosinam Deo et monasterio Beati Stephani Diuionensis et uiris religiosis ibi Deo seruientibus pro anniuersario meo singulis annis in eodem monasterio in perpetuum faciendo uiginti solidos monete Uiennensis de annuo et perpetuo redditu quos assedi percipiendos et habendos et dictis abbati et conuentui uel eorum mandato reddendos super medietatem meam furni de Cambiis siti Diuione iuxta domum in qua Guillelmus forbissator moratur et iurium ac pertinenciarum et exituum furni predicti singulis annis perpetuo in festo Natiuitatis Beati Johannis Baptiste post decessum Stephani de Vougerro clerici cui ad uitam eius medietatem furni uendidi supradicti ita quod quicumque medietatem predictam dicti furni et iurium et pertinenciarum eius tenebit de cetero post decessum dicti Stephani dictos uiginti solidos Uiennenses dictis abbati et conuentui uel eorum mandato annuatim predicto termino sine contradictione uel occasione qualibet reddat et reddere teneatur et nisi tunc soluti fuerint uolo et dictis abbati et conuentui do potestatem et mandatum ut extunc ex auctoritate propria sua et sine clamore cuiuslibet curie dicte medietatis furni et iurium et pertinenciarum eius intrent possessionem et debeant intrare eamque teneant fructus ex ea faciendo modis omnibus suos quousque dicti uiginti solidi pro quolibet anno quo soluti non fuerint integre persoluantur et ad hoc ipsam medietatem furni et illos qui eam tenebunt pro tempore in perpetuum obligo promittens per sacramentum meum contra dictam elemosinam de cetero per me uel per alium non uenire tacite uel expresse Hec autem omnia pro ut superius continentur ego Johannes dictus Goberz miles maritus dicte domine Parisie esse uera firmiter assero et de uolontate mea facta et ea tenere et obseruare firmiter et inuiolabiliter in perpetuum et in nullo contraire per me uel per alium tacite uel expresse promitto per sacramentum meum prestitum super hoc corporale Et ut hec omnia rata sint et firma perpetuo nos Parisia et Johannes predicti litteris istis sigilla uirorum uenerabilium domini Petri decani capelle Ducis et magistri Alberici decani Christianitatis Diuionensis rogauimus et fecimus apponi in testimonium ueritatis Actum datum sigillatum anno et mense predictis