Charter Document - 05280031
| Charter Number: | 05280031 |
|---|---|
| Cartulary Title: | Du vol et de sa répression en Bourgogne sous l'ancien droit et Chartes de l'abbaye de Saint-Etienne de Dijon, de 1260 à 1270. |
| Charter Language: | Latin |
| Charter Origin: | Lay |
| Charter Type(s): | Sale |
| Date: | 1266 |
| Date type: | Internal, A.D. |
| Resource Link(s): |
|
Charter:
In nomine Domini amen Anno incarnationis eiusdem millesimo ducentesimo sexagesimo sexto mense aprilis ego Symoneta domicella filia domine Agnetis de Waranges uxor Girardi filii defuncti Stephani dicti Girot notum facio omnibus presentes litteras inspecturis quod ego prouida deliberatione non in aliquo circonuenta pro utilitate mea uendidi concessi et quittaui de uoluntate et consensu predicti mariti mei in hereditatem perpetuam uiris uenerabilibus et religiosis abbati et conuentui Sancti Stephani Dyuionensis tertiam partem tertie partis medietatis sedis cuiusdem molendini siti supra Tyliam mouentem de capite meo et omnium iurium et pertinenciarum dicte sedis in aquis aquarum decursibus piscaturis fundo bisso inferius et superius sitis bannis et redditu bladi et in omnibus exitibus bonis commodis et aliis omnibus quibuscumque Que sedes sita est supra pratum dictorum abbatis et conuentus quod uocatur Espaillart et uocatur illa sedes molendinum de Tyle situm inter Genleium et Waranges De cuius uenditionis precio iusto et legittimo plenum et integrum pagamentum recepi et habui in pecunia numerata et propter hoc de tertia parte tertie partis medietatis sedis molendini predicti et omnium iurium et pertinenciarum ipsius me penitus deuestiens ego dictos abbatem et conuentum corporaliter inuestiui per manum domini Amidei nunc abbatis dicti loci Et teneor ac promitto in solidum et pro toto et sub obligatione bonorum meorum omnium mobilium et immobilium presentium et futurorum et per sacramentum meum pro me et heredibus meis quos at hoc obligo prestitum supra sancta Dei euangelia corporale tertiam partem tertie partis medietatis sedis predicti molendini et omnium iurium et pertinenciarum ipsius garantire dicti abbati et conuentui et eorum successoribus perpetuo contra omnes in allodium liberum et me pro eis semper et ubique locorum et in omnia curia contra personas omnes opponere propter hoc et respondere propriis sumptibus et eos conseruare modis omnibus indempnes si qui calumpniatores apparerent quod absit et in nullo contraire de cetero per me uel per alium uerbo uel consensu aut modo alio qualicumque renuntians in hoc facto exceptioni non numerati et non habiti integre precii et exceptioni minoris precii exceptioni doli et in factum juri dicenti uenditionem sine certo precio non ualere et omni auxilio iuris et consuetudinis et facti Has autem uenditionem concessionem et quittationem predictas ego Girardus predictus maritus predicte Symonete laudo et approbo et de consensu meo ac etiam uoluntate confiteor factas esse promittens nichilominus sub obligatione bonorum meorum omnium et per sacramentum meum corporaliter prestitum predicta omnia prout superius sunt expressa garantire predictis abbati et conuentui et eorum successoribus ac etiam deffendere perpetuo contra omnes et quod contra dictas uenditionem concessionem et quittationem seu contra presentes litteras non ueniam de cetero modo quolibet nec uenire per alium faciam aut permittam tacite uel expresse renuntians in hoc facto omnibus exceptionibus que possent obici contra presens instrumentum uel factum et omnibus aliis que factum hujusmodi possent aliquatenus impedire aut in aliquo perturbare In cuius rei testimonium presentibus litteris sigilla uirorum uenerabilium domini Petri decani capelle Ducis et magistri Alberici decani Christianitatis Dyuionensis nos Symonetta et maritus eius predicti fecimus et rogauimus apponi Actum anno Domini MCC sexagesimo sexto mense aprilis