Charter Document - 05280025
| Charter Number: | 05280025 |
|---|---|
| Cartulary Title: | Du vol et de sa répression en Bourgogne sous l'ancien droit et Chartes de l'abbaye de Saint-Etienne de Dijon, de 1260 à 1270. |
| Charter Language: | Latin |
| Charter Origin: | Lay |
| Charter Type(s): | Purchase |
| Date: | 1264 |
| Date type: | Internal, A.D., Feast |
| Resource Link(s): |
|
Charter:
In nomine Domini amen Anno incarnationis eiusdem MCC sexagesimo quarto mense decembri ego Odo filius defuncti Hugonis de Cuntigneio notum facio omnibus presentes litteras inspecturis quod ego prouida deliberatione non in aliquo circonuentus pro utilitate et necessitate mea uendidi concessi et quittaui in hereditatem perpetuam uiro uenerabili magistro Alberico decano Christianitatis Dyuionensis domum meam totam cum scrinia eiusdem et cum manso iuribus et pertinenciis ipsius omnibus prout usque ad mansum seu plateam quem uel quam a Perrello fratre meo acquisiuit titulo legittimo emptionis que domus predicta sita est Dyuione in uico qui uocatur uicus Porte Canonicorum iuxta domum Cistercii que fuit Girardi de Menigneio ex una parte et iuxta mansum heredum Perelli de Pereceio ex altera Uendidi concessi et quittaui in hereditatem perpetuam predicto magistro Alberico quicquid iuris et rationis habebam et habere poteram et debebam in uoleria contigua predicte domui et in manso et pertinenciis uolerie predicte nichil pro me uel meis heredibus in domo et uoleria predictis et in mansis et iuribus et pertinenciis earum penitus retinendo De cuius uenditionis precio iusto et legittimo plenam perfectam et integram solutionem a dicto magistro Alberico recepi et habui in pecunia numerata et propter hoc de predictis domo uoleria scrinia manso iuribus et pertinenciis supradictis ego me penitus deuestiens dictum magistrum Albericum corporaliter inuestiui Et teneor et promitto sub obligatione bonorum meorum omnium mobilium et immobilium presentium et futurorum et per sacramentum meum pro me et meis heredibus quos ad hoc obligo prestitum super hoc corporale predicta uniuersa et singula prout in uenditione presenta continentur garantire dicto magistro Alberico et eius heredibus perpetuo contra omnes et me pro eo et eius heredibus semper et ubique locorum et in omni curia contra personas omnes opponere propter hoc et respondere propriis sumptibus et eos inde conseruare indempnes modis omnibus si qui calumpniatores apparerent quod absit et in nullo contraire de cetero per me uel per alium uerbo uel facto siue consensu seu iure uel consuetudine aut modo alio qualicumque Hanc autem uenditionem ego Perronetta uxor dicti Odonis sponte prouide sine ui et metu et sine circonuentione qualibet laudo et rata et firma habeo et promitto in perpetuum habere iuramento prestito corporali et in nullo contraire de cetero per me uel per alium ratione dotis uel donationis propter nuptias uel auerie uel modo alio qualicumque Renuntiamus autem nos Odo et Perronetta predicti quilibet in solidum et pro toto in hoc facto exceptioni non habiti non numerati et non soluti integre precii et exceptioni minoris uel deceptionis ultra dimidiam iusti precii et omni auxilio juris et consuetudinis et facti et omnibus iuribus et gratiis in fauorem mulierum introductis et omnibus defensionibus exceptionibus occasionibus iuribus rationibus consuetudinibus et aliis quibuscumque que possent obici contra hoc instrumentum uel factum In cuius rei robur et memoriam ac testimonium presentibus litteris sigilla uirorum uenerabilium domini Amidei abbatis Sancti Stephani et domini Petri decani capelle Ducis Diuionensis rogauimus et fecimus apponi Actum anno et mense predictis die iouis ante festum beati Thome apostoli