Charter Document - 05280017

Je Jehanz sires de Trichatel ie fais sauoir a tous cels qui uerront ces presentes letres que ie por le remede de larme mon pere de ma mere et de la moie et de larme Marie ma fame Simonete en seurnom et de nos ancessors ay done et otroie en aumosne parmaignable a Deu et a Nostre Dame et au priore de Trichatel dis et set amines de bled moitie consael et moitie auoine [a la mesure de Trichatel] a panre et a receuoir [et a randre et a delibrer au prior dou deuant dit priore de Trichatel ou a son commendement des or en auant] chascun an [touz iormais] le diemenge deuant la feste de Touzsainz en mes greniers de Trichatel [ou la ou mi grenier seroient se il nestoient a Trichatel dou blé de mon gaaignage ou de mes rantes] Auec ce ie ai done au dit priore quatre muis de uin pur et de pie a panre [et au dit priore ou a son commendement randre et deliurer] desormais chascun an [parmaignablement] en mon clox de Gemels le ior que lidiz clox sera uendengez Et ai ancor done audit priore sexante et dis sols [d'esteuenans ou] de uiennois a panre [et a receuoir] trante solz de ladite monnoie ou payage de Trichatel le diemenge prochien apres la feste de Touzsainz de celuy qui receura le deuant dict payage et les quarante solz de la dite monnoie es seruises que mi sergent me doiuent [chascun an de lors seruises] landemain de la Natiuite Nostre Seignor [lesquels quarante solz le receueur des deuant ditz seruises est tenuz a deliurer tantost comme il les aura receuz ou prior deuant dit ou a ses commendemens] Auec toutes ices choses iai otroie audit priore a touiormais la uigne qui fut Ermeniart Doupont laquele messires Guiz le prestres qui fu curez de Trichatel dona a l'autel Saint Honoré qui est en l'eglise dou dit priore et ce de Varonnes et la uigne qui fut Aubadet laquelle uigne auec ce de Varonnes desusdit Tiebaudins mes sergenz dona audit autel [Et ai ancor done audit priore dous solz de cens que Oubriz le Menestreis dona a l'autel de Saint Honore deuant dit lesquels dous solz il assigna sus sa uigne desus l'estanc que Parisoz Cousols de Marcilli tenoit en tel maniere que cil qui tenra la deuant dicte uigne est tenuz de paier les deuant ditz dous solz chascun an a touiorsmais au deuant dit prior ou a son commendement le ior de la Touzsainz Et ai ancore doné au priore deuant dict dous solz de cense que Ancloz qui fut fame Perrenot Bonemère laissa au deuant dit autel quele assist et assigna sus la uigne qui siet selonc la uigne Guenot le Tanneur d'une part et dez la uigne au Chamblanc dautre a paier chacun an a touiormais le ior de la Natiuité Nostre Dame quon apele Brisetriul audit prior ou a son commendement de celui qui tenra la deuante dite uigne] Et avec toutes ces choses deuant dictes ie ai doné au priore en aumosne parmaignable li diz liures de Uiennois que li diz priorez me deuoit chascun an por chief de mon for [que ie soloie auoir deuant le pont de mon donion de Trichatel] desqueles dis liures li priours de Trichatel ou li habitant ou priore paieront sexante solz chascun an a moi ou a mon commendement [ou a celui qui sera sires de Trichatel ou a son commendement] le ior de l'uitaue Nostre Dame anmi aoust por departir en l'église es preuoires et es clerz qui seront presens a faire le seruise de lanniuersaire Marie ma fame Simonete en seurnom et de ces dis liures meismes autres sexante solz de Uiennois a rendre chascun an apres mon décès a celuy qui sera sires de Trichatel ou a son commendement pour departir le ior quon fera mon anniuersaire en la dite église es preuoires et clerz qui seront a faire le servise Toutes ces choses deuant dites ai ie faictes par lou los et par l'otroi de Guiot mon fil et de Mahaut sa fame qui les ont promises par deuant moy a tenir et a garder en bone foi a touziorsmais et se toutes ces choses deuant dictes nestoient paies au devànt dit prior de Trichatel ou a son commendement chascun an es termines desus diz ie uuil et otroi et pri por moi et por mes hoirs que cil qui seroit euesques de Lengres ou ses officials moi ou celui qui seroit sires de Trichatel deuant admoneste et le preuost de Trichatel qui que il soit en tans et meismemant Trichatel meste en antredit a la requeste de l'abbé de Saint Estiene de Dijon ou de son commendement ou dou prior de Trichatel iusqua tant que toutes ces choses deuant dites soient paies et rendues [et acomplies audit prior ou a son commendement] anterinement si comme eles sont desus diuisees En tesmoig de toutes ces choses deuant dites ie ay mis mon sael en ces presentes letres par l'otroi [et par la requeste] de Guiot mon fil et de Mahaut sa fame Ce est faict en lan de grace mil deux cent sexante et trois ou mois de decembre