Charter Document - 05280011
| Charter Number: | 05280011 |
|---|---|
| Cartulary Title: | Du vol et de sa répression en Bourgogne sous l'ancien droit et Chartes de l'abbaye de Saint-Etienne de Dijon, de 1260 à 1270. |
| Charter Language: | French |
| Charter Origin: | Lay |
| Charter Type(s): | Sale |
| Date: | 1262 - 1263 |
| Date type: | Internal, A.D. |
| Resource Link(s): |
|
Charter:
Je Jehainz sires de Trichastal faiz sauoir a touz celz qui uerront ces lettres que messire Jehainz d'Iz cheualiers mes amez et mes fois estaubliz en ma presence a recoineu por deuant moi quil a uenduy a tou iorz au maistre et es freres de lai masiun Deu de Trichastal tou ce quil auoit ou dyme de Veroines les Petites senz neans retenir por dix et huit libres de Viannos des quex li diz Jehainz sest tenus por ben paez por deuant moi Et auoic ce le diz Jehainz a recoineu por deuant moi que deuant ce que ceste uendue fust faites ne por esseruie il auoit doiney et outroi en aumosne a tou iorz a Deu et a Nostre Dame et es freres de la masun Deu de Trichastal por lu et por ses ansesours sur ce quil auoit ou dit dyme de Verones les Petites un bichet de bley por mey a penre chascun an deuant quil ne ses commandemanz priessent neant en la ysue dou dyme desus dit Et se nus es freres de la dite masun Deu de Trichastal auloit encontre de ceste uendue li diz Jehainz lor en a promis por sun saremant porter leaul guarantie En tesmoinage de cette chouse ie a la requeste de mon segnor Jehainz d'Iz a mis mon seaul en ces lettres faites en lan de nostre segnor mil et dus cenz et sexainte et dus ou mois de faurer