Charter Document - 05280007
| Charter Number: | 05280007 |
|---|---|
| Cartulary Title: | Du vol et de sa répression en Bourgogne sous l'ancien droit et Chartes de l'abbaye de Saint-Etienne de Dijon, de 1260 à 1270. |
| Charter Language: | Latin |
| Charter Origin: | Lay |
| Charter Type(s): | Sale |
| Date: | 1262 |
| Date type: | Internal, A.D. |
| Resource Link(s): |
|
Charter:
In nomine Domini amen Anno incarnationis eiusdem millesimo ducentesimo sexagesimo secundo mense maii ego Regina filia domine Clemente quondam uxoris domini Henrici de Monz domine de Maiserez notum facio omnibus presentes litteras inspecturis quod ego sponte prouide sine qualibet circonuentione pro mea utilitate speciali uendidi et concessi uiris uenerabilibus et religiosis abbati et conuentui Sancti Stephani Diuionensis usque ad sex annos integros proximo et continue uenturos sex messes integras continentes quarum prima incipiet in messe proximo uentura anni Domini millesimi ducentesimi sexagesimi secundi medietatem fructuum tertie partis tocius decime qualiscumque uillarum et finagiorum omnium de Stabulis et de Darrois que tota tertia pars ipsius decime mouet et est de feodo Ecclesie Sancti Stephani supradicte De cuius uenditionis precio iusto et legittimo plenam perfectam et integram solutionem recepi et habui in pecunia numerata ab abbate et conuentu predictis et propter hoc de dicta medietate fructuum predicte tertie partis ipsius decime et de exitibus iuribus et rationibus ipsius medietatis fructuum dicte tertie partis decime ego me deuestiens ecclesiam Beati Stephani predictam per manum uiri uenerabilis Amidei tunc abbatis eiusdem ecclesie inuestiui corporaliter usque ad terminum supradictum Uenditionem aut solutionem et uestituram predictam ego Guillelmus de Lonuei maritus dicte Regine uolo laudo concedo et approbo et eas de uoluntate mea et pro utilitate dicte Regine de cujus maritagio mouet et est predicta medietas tertie partis decime confiteor esse factas Insuper nos Guillelmus et Regina tenemur et promittimus quilibet in solidum et pro toto sub obligatione bonorum nostrorum omnium mobilium et immobilium presentium et futurorum et per sacramentum nostrum pro nobis et nostris heredibus quos ad hoc obligamus prestitum corporale dictam medietatem fructuum predicte tertie partis predicte decime cum exitibus iuribus et rationibus illius medietatis tertie partis garantire dictis abbati et conuentui et eorum successoribus contra omnes usque ad terminum supradictum et nos pro eis semper et ubique locorum et in omnia curia contra personas omnes opponere propter hoc et respondere propriis sumptibus usque ad dictum terminum et eos inde conseruare modis omnibus indempnes si qui contrairent quod absit et in nullo per nos uel per alios contraire uerbo uel facto seu consensu uel modo alio qualicumque renuntiantes quilibet in solidum in hoc facto per sacramentum nostrum exceptioni non habiti integre precii et exceptioni minoris aut deceptionis ultra dimidiam iusti precii et omni consuetudini et statuto cuiuslibet patrie et omni auxilio iuris canonici et ciuilis et omnibus auxiliis priuilegiis gratiis et iuribus in fauorem mulierum introductis et omnibus que possent obici contra hoc instrumentum uel factum In cuius rei testimonium et munimen presentibus litteris sigilla uirorum uenerabilium domini Mercatoris decani capelle Ducis et magistri Alberici decani Christianitatis Diuionensis rogauimus et fecimus apponi Actum anno et mense predictis