Charter Document - 05280006

In nomine Domini amen Anno incarnationis eiusdem MCC sexagesimo secundo mense maii nos Dominicus et Herbertus fratres filii Alberici Cornuti notum facimus omnibus presentes litteras inspecturis quod nos pro utilitate et necessitate nostra uendidimus concessimus et quittauimus in hereditatem perpetuam in nostra libera potestate uiris religiosis magistro et fratribus Domus Dei de Tilecastro domum nostram mouentem de nostro capite ex parte patris nostri cum manso et pertinenciis dicte domus prout usque supra uineam dictorum magistri et fratrum se ingerunt que domus predicta sita est Dyuione in uico de la Maladiere intra domum et mansum quos ipsi magister et fratres ab Odino Cornuto auunculo nostro acquisiuerunt titulo legittime emptionis De cuius uenditionis precio iusto et legittimo plenam perfectam et integram solutionem recepimus et habuimus in pecunia numerata et propter hoc de dicta domo et de manso et pertinenciis ipsius prout modo premisso se ingerunt et de iuribus aliis eiusdem nos omnino deuestiuimus et dictos magistrum et fratres corporaliter inuestiuimus et in plenum dominium et possessionem corporalem ueram et perpetuam induximus Uenditionem aut solutionem et uestituram predictas ego Perronetta filia defuncti Gileberti Esclaure mater dictorum Dominici et Herberti laudo et ratas et firmas habeo et in perpetuum habere promitto et eas de uoluntate mea confiteor esse factas Insuper nos Dominicus Herbertus et Perronetta predicti tenemur et promittimus quilibet in solidum et pro toto sub obligatione bonorum nostrorum omnium mobilium et immobilium presentium et futurorum et per sacramentum nostrum pro nobis et nostris heredibus quos ad hoc obligamus prestitum corporale dictam domum cum manso et omnibus iuribus et pertinenciis ipsius prout modo premisso se ingerunt garantire dictis magistro et fratribus et eorum successoribus perpetuo contra omnes et nos pro eis semper et ubique locorum et in omni curia contra personas omnes opponere propter hoc et respondere propriis sumptibus et eos inde conseruare modis omnibus indempnes si qui calumpniatores apparerent quod absit et in nullo de cetero per nos uel per alios uerbo uel facto seu consensu uel modo alio contraire Renuntiamus autem quilibet in solidum et pro toto ex certa scientia per sacramentum nostrum in hoc facto exceptioni non habiti et non recepti integre precii et exceptioni minoris aut deceptionis ultra dimidiam iusti precii et omni consuetudini et statuto cuiuslibet patrie legi Iulie de fundo dotali non alienando et omnibus auxiliis gratiis priuilegiis et iuribus in fauorem mulierum introductis et omni auxilio iuris canonici et ciuilis et omnibus deffensionibus exceptionibus occasionibus dilationibus et aliis que possent obici contra hoc instrumentum uel factum In quorum omnium memoriam et munimen presentibus litteris sigilla uirorum uenerabilium domini Mercatoris decani capelle Ducis et magistri Alberici decani Christianitatis Dyuionensis supplicauimus et fecimus apponi in testimonium ueritatis Actum anno et mense predictis