Charter Document - 05280002

In nomine Domini amen Anno incarnationis eiusdem millesimo ducentesimo sexagesimo primo mense octobris ego Renaudus filius Dominici Quinonridet notum facio omnibus presentes litteras inspecturis quod ego prouida deliberatione in mea libera potestate pro utilitate et necessitate mea uendidi concessi et quittaui in hereditatem perpetuam magistro et fratribus Domus Dei de Tilecastro duas pecias terre arabilis que inter cetera ad partem meam deuenerunt sitas in finagio sancti Martini ubi dicitur ad Barram super Susonem quarum una sita est inter terram heredum defuncti Guillelmi Aucorroise hinc inde et alia iuxta terram eorumdem heredum ex una parte et iuxta terram Odonis Scabiosi ex altera De cuius venditionis precio iusto et legittimo plenam perfectam et integram solutionem recepi et habui in pecunia numerata et propter hoc de dictis duabus peciis terre ego me penitus deuestiens dictos magistros et fratres corporaliter inuestiui et in uerum dominium et possessionem corporalem ueram et perpetuam induxi Uenditionem autem solutionem et instituram predictas ego Dominicus Quinonridet frater dicti Renaudi et ego Dannoz uxor ipsius Dominici mater dicti Renaudi laudamus et ratas et firmas habemus et promittimus in perpetuum habere et a dicto Renaudo nos partitos et diuisos esse et dictas duas pecias terre ad partem ipsius inter cetera deuenisse confitemur Insuper nos Renaudus Dominicus et Dannos predicti tenemur et promittimus quilibet in solidum et pro toto sub obligatione bonorum nostrorum omnium mobilium et immobilium presentium et futurorum et per sacramentum nostrum pro nobis et nostris heredibus quos ad hoc obligamus prestitum corporale dictas duas pecias terre garantire dictis magistro et fratribus contra omnes perpetuo liberas ab omni exactione et onere pro recta decima et recto censu et nos pro eis semper et ubique locorum et in omni curia contra personas omnes opponere propter hoc et respondere propriis sumptibus et eos inde conseruare modis omnibus indempnes si qui calumpniatores apparerent quod absit et in nullo de cetero per nos uel per alios uerbo uel facto seu consensu uel modo quolibet alio contraire Renuntiamus autem quilibet nostrum in solidum et pro toto per sacramentum nostrum corporaliter prestitum ex certa scientia in hoc facto exceptioni non habiti et non recepti integre precii et exceptioni minoris uel deceptionis ultra dimidiam iusti precii legi Iulie de fundo dotali non alienando et omnibus iuribus et priuilegiis in fauorem mulierum introductis et omni consuetudini et statuto cuiuslibet patrie et omni auxilio iuris canonici et ciuilis scripti et non scripti promulgati et promulgandi et omnibus que possent obici contra instrumentum uel factum Et ego Johannes clericus frater dicti Renaudi licet ab ipso partitus et diuisus uenditionem predictam laudo et ratam et firmam habeo et in perpetuum habere promitto bona fide et in nullo de cetero contraire per me uel per alium uerbo seu consensu uel modo alio qualicumque et ipsas duas pecias terre ad partem dicti Renaudi confiteor inter cetera deuenisse In quorum omnium memoriam et munimen nos omnes predicti presentibus litteris sigilla uirorum uenerabilium domini Mercatoris decani capelle Ducis et magistri Alberici decani Christianitatis Diuionensis rogauimus et fecimus apponi in testimonium ueritatis Actum anno et mense predictis