Charter Document - 05270097

Nos Amees abbes et li couuenz de Saint Estiene de Dyion et ge Jehans sires de Trichatel facons sauoir a touz cels qui uerront cels presentes lettres que comme descorz fust antre nos dou marchie que ie Jehanz sires de Trichatel auoie fait crier nouelement a lu lou quel l'abbes et li couuenz ne conoissoient mie que ie le poisse faire par le consoil de proudomes nos auons acorde en tel meniere que ie Jehanz sires de Trichatel reconois de ma propre uolente et lou promet par mon sairement doné corporelment sus sainte euuangile que ie ne mi hoir ne ferons iamais marchie ne foire mais que doues foires que l'abbes et li couuenz m'ont otroie si com il est contenu ci desouz a Trichatel ne defors de trois lices anuiron Trichatel de toutes parz ainz deuons conduire et garder le marchie de Trichatel a l'abbe et au couuent de Saint Estiene de Dyion et au priore de Trichatel a bone foi et reconois que toutes les issues dou dit marchie sont au priore de Trichatel sauf les estalaiges et la iustise dou marchie et nos l'abbes et li couuenz deuant dit reconoissons que nos auons otroie au deuant dit seignor de Trichatel et a ses hoirs a faire doues foires a Trichatel a touz iors mais chascun an et quelque raison que nos eussiens en cels doues foires por chief dou marchie nos lou quittons et otroions au dit seignor de Trichatel et a ses hoirs et de cels doues foires li une doit commencier le lundi matin deuant la feste Saint Andrie et doit durer iusque le samedi a soir pruchien après et li autre doit durer des landemain matin de la Trinite iusque le samedi a soir pruchien apres et aussi tost comme chascune des dites foires sera faillie li marchiez et les issues dou marchie repaireront et doiuent repairier au priore de Trichatel et ge Jehanz sires de Trichatel reconois que l'abbes et li couuenz deuant diz et li prious et li chanoine de Trichatel ont atrait a Trichatel et se il uient home a Trichatel et il gise premierement ou mes a l'ome dou priore de Trichatel ie ne mi hoir ne le poons retenir que il ne soit hons a l'abbe et au couuent et au priour deuant diz et nos l'abbes et li couuenz reconoisons ausi que se li homs gist premierement ou mes a l'ome au seignor de Trichatel nos ne le poons retenir que il ne soit ses homs et reconoissons nos l'abbes et li couuenz et li sires de Trichatel que nostre home de Trichatel ont aquez li un sus les autres et que il poent doner en mariages li un as autres de lor mobles et de lor herietages et reconois ge Jehanz sires de Trichatel que li priour et li chanoine dou priore de Trichatel et li home dou priore ont usaiges et aisances par tout ausi comme mi home de Trichatel et que li prious puet exploitier de ses homes de tailles et dayes a sa uolente Apres nos l'abbes et li couuenz et li sires de Trichatel deuant dit reconoissons que nos ne poons retenir li uns les homes a l'autre de Trichatel ne de la Chatelerie Encor reconois ie Jehanz sires de Trichatel que ie ne puis abandener a mes homes de Trichatel a user en bois ne en aigues ne en perrieres ne en pastures que li home dou priore de Trichatel et li prious et li chanoine dou priore ni usoient et promet a l'abbe et au couuent et au priour et as chanoines deuant diz lor et lor possessions et touz lor biens qui apartienent au priore de Trichatel garder a bone foi iusque a droit et reconois ancor que li prious de Trichatel doit panre chascun an cinquante solz desteuenans ou paiage de Trichatel que li paagerres doit randre le ior de feste Saint Jehan Baptiste por chief de l'anniuersaire mon seignor Hugon mon oncle toutes ces choses desus nomees et deuisees ie ai promis a garder et a faire et a tenir por moi et por mes hoirs par mon sairement corporelment done et se ie ou mi hoir ou autres por moi ou por mes hoirs encontre ces choses ou aucune de ces choses aliens ge uoeil et octroi et pri mon seignor l'euesque de Lengres qui or est ou qui seroit euesques de Lengres entens que il mette en cels qui encontre en iroient a la requeste de l'abbe de Saint Estiene ou de son commendement sentence descomeniement et la teigne tant que sattisfacions soit faite anterinement de ce donc l'en seroit alez encontre a l'abbe et au couuent deuant diz et que l'en fust repairiez as conuenances deuant dites Toutes ces choses deuant dites ie Marie qui est apelee Symone fame au dit seignor de Trichatel et ie Guioz lor filz loons et uolons et otroions et prometons a tenir a touz iors mais par noz sairemenz sus sainte euuangile corporelment donez et que iamais n'irons encontre par nos ne par autre Ou tesmoing de toutes ces choses nos Amees abbes et li couenz de Saint Estiene de Dyion et ie Jehanz sires de Trichatel auons mis nos seals en ces presentes lettres et a plus grant seurce nos l'abbes et li couuenz et li sires de Trichatel et Marie et Guioz deuant dit auons prie et requis a mettre en ces presentes letres lou seal de redoutable pere mon seignor Guion par la grace de Deu euesques de Lengres et nos Guiz par la grace de Deu euesques de Lengres par la prieir des parties desus nomees auons fait mettre nostre seal en ces presentes lettres Ce est fait en l'an de grace MCC et cinquante nuef ou mois de septembre